تیسرے اور فیصلہ کن ون ڈے میں ویسٹ انڈیز نے پاکستانی بولرز کو آڑھے ہاتھوں لیتے ہوئے ان کا بھرکس نکال دیا اور کپتان شائے ہوپ کی 120 رنز کی اننگز کی بدولت پاکستان کو جیت کے لیے 295 رنز کا ہدف دے دیا۔

پاکستان اور ویسٹ انڈیز کے درمیان 3 میچوں کی سیریز کا تیسرا اور آخری ون ڈے آج برائن لارا کرکٹ اکیڈمی میں کھیلا جارہا ہے۔

پاکستان کی دعوت پر پہلے بیٹنگ کرتے ہوئے ویسٹ انڈیز نے کپتان شائے ہوپ کی سینچری کی بدولت مقررہ 50 اوورز میں 6 وکٹوں کے نقصان پر 294 رنز اسکور کیے۔

ویسٹ انڈیز کی بیٹنگ

ویسٹ انڈیز کی جانب سے اوپنز ایون لوئس اور برینڈن کنگ نے اننگز کا آغاز کیا، بلے بازوں نے ابتدا سے ہی محتاط انداز میں بیٹنگ کی اور وقفے وقفے سے وکٹیں گرنے کے باوجود بیٹرز اسکور بورڑ پر رنز جوڑتے رہے، 10 کے مجموعے پر برینڈن کنگ 5 رنز بنا کر آؤٹ ہوئے۔

جس کے بعد ایون لائس نے کیاسی کارٹی کے ساتھ مل کر ٹیم کا اسکور آگے بڑھایا اور ٹیم کے اسکور میں 47 رنز کا اضافہ کیا تاہم 57 کے اسکور پر ایون لوئس 37 رنز بناکر ابرار احمد کی گیند پر کیچ آؤٹ ہوگئے۔

ویسٹ انڈیز کو تیسرا جھٹکا 68 کے اسکور پر لگا جب کیاسی کارٹی صرف 17 رنز پر پویلین لوٹ گئے، انہیں بھی ابرار احمد نے اپنا شکار بنایا۔

اس کے علاوہ شرفین ردرفورڈ 15، راسٹن چیز 36 رنز بنا کر نسیم شاہ کا شکار بنے جبکہ گداکیش موتی صرف 5 رنز ہی بنا سکے۔

کپتان شائے ہوپ نے شاندار بلے بازی کا مظاہرہ کیا، انہوں نے ناقابل شکست رہتے ہوئے 94 گیندوں پر 120 رنز بنائے، اس دوران انہوں نے 10 چوکے اور 5 چھکے بھی لگائے۔

جسٹن گریوز نے بھی شائے ہوپ کا بھرپور ساتھ دیا اور 24 گیندوں پر دھواں دار 43 رنز بنا کر ناٹ آؤٹ رہے جبکہ ساتویں وکٹ پر شائے ہوپ اور جسٹن گریوز کے درمیان 50 گیندوں پر 110 رنز کی شراکت قائم ہوئی۔

آخری 10 اوورز میں پاکستانی بولرز نے 119رنز لٹائے۔ اس طرح ویسٹ انڈیز نے پاکستان کو میچ جتینے کے لیے 295 رنز کا بڑا ہدف دے دیا۔

پاکستان کی جانب سے فاسٹ بولر نسیم شاہ اور اسپنر ابرار احمد نے 2، 2 وکٹیں اپنے نام کیں، محمد نواز اور صائم ایوب کے حصے میں ایک، ایک وکٹ آئی۔

میچ کا ٹاس

میچ کا ٹاس پاکستان کے کپتان محمد رضوان نے جیت کر ویسٹ انڈیز کو و پہلے بیٹنگ کرنے کی دعوت دی ہے۔

میچ کے لیے پاکستان نے اپنی پلیئنگ الیون میں ایک تبدیلی کی ہے، فاسٹ بولر شاہین شاہ آفریدی کی جگہ نسیم شاہ کو فائنل اسکواڈ میں شامل کر لیا گیا ہے۔

اس اہم میچ میں دونوں ٹیموں کے کپتان اور کھلاڑی بہترین کھیل پیش کرنے کے لیے پرعزم ہیں۔

پاکستان کا اسکواڈ

پاکستان کی ٹیم میں کپتان محمد رضوان، عبداللہ شفیق، صائم ایوب، بابر اعظم، سلمان علی آغا، حسن نواز، حسین طلعت، محمد نواز، نسیم شاہ، حسن علی اور ابرار احمد شامل ہیں۔

ویسٹ انڈیز کا اسکواڈ

ویسٹ انڈیز کی ٹیم میں کپتان شائے ہوپ، برینڈن کنگ، ایون لوئس، کیاسی کارٹی، شرفین ردر فورڈ، روسٹن چیز، روماریو شیفرڈ، جسٹن گریوز، گوداکیش موتی، شمار جوزف اور جیڈن سیلز شامل ہیں۔

خیال رہے کہ پہلے ایک روزہ میچ میں پاکستان نے حسن نواز اور حسین طلعت کی شاندار بلے بازی کی بدولت میزبان ٹیم کو 5 وکٹوں سے شکست دی تھی۔ قومی ٹیم نے 280 رنز کا ہدف 5 وکٹوں کے نقصان پر حاصل کر لیا تھا۔

بارش سے متاثرہ دوسرے ون ڈے میں ویسٹ انڈیز نے پاکستان کو ڈرک ورتھ لوئس سسٹم (ڈی ایل ایس) کے تحت 5 وکٹوں سے شکست دے کر سیریز ایک، ایک سے برابر کر دی تھی۔

اعداد و شمار کے مطابق پاکستان نے گزشتہ 33 برسوں میں ویسٹ انڈیز کے خلاف 10 ون ڈے انٹرنیشنل سیریز جیتی ہیں جبکہ ویسٹ انڈیز نے پاکستان کے خلاف آخری مرتبہ 1991-92 میں سیریز اپنے نام کی تھی جس کے بعد سے وہ گرین شرٹس کے خلاف کسی بھی سیریز میں کامیابی حاصل نہیں کر سکا۔

اگرپاکستان آج کا میچ جیتا تو میزبان ٹیم کے خلاف مسلسل 11 ویں ون ڈے سیریز اپنے نام کرے گا اور اگر ویسٹ انڈیز نے میچ اپنے نام کیا تو پاکستان کے خلاف 33 سال بعد کوئی ون ڈے سیریز اپنے نام کرے گا۔

واضح رہے کہ اس سے قبل دونوں ٹیموں کے درمیان کھیلی گئی ٹی 20 سیریز میں گرین شرٹس نے 1-2 سے کامیابی حاصل کی تھی۔

2 بار کی عالمی چیمپئن ویسٹ انڈیز ون ڈے ورلڈ کپ میں براہ راست کوالیفائی کرنے کے لیے سیریز کو اہم قرار دے رہی ہے۔

اس سے قبل ویسٹ انڈیز کی ٹیم نے تاریخ میں پہلی بار 2023 میں بھارت میں ہونے والے ورلڈ کپ کے لیے کوالیفائی نہیں کیا تھا۔