عمران خان کا پولی گرافگ، فوٹوگرامیٹک اور وائس میچنگ ٹیسٹ کرانے سے پھر انکار

پاکستان تحریک انصاف (پی ٹی آئی) کے بانی چیئرمین عمران خان نے آج پھر پولی گرافگ، فوٹوگرامیٹک اور وائس میچنگ ٹیسٹ کرانے سے انکار کردیا۔

تفصیلات کے مطابق بانی پی ٹی آئی عمران خان نے لاہور کی تفتیشی ٹیم کے ساتھ شامل تفتیش ہونے سے دوسرے دن بھی انکار کر دیا جبکہ سابق وزیراعظم نے ٹسٹس نہ کرانے کا تفتیشی ٹیم کو اپنا مؤقف تحریری شکل میں بھجوادیا۔

عمران خان نے مؤقف اختیار کیا کہ ان ٹیسٹوں کے ذریعے پراسیکوشن مجھے پھنسانا چاہتی ہے، میرے 8 مقدمات میں ضمانتیں عدالت عالیہ میں زیر سماعت ہیں۔

دوسری جانب ڈی ایس پی جاوید آصف نے بتایا کہ بانی پی ٹی آئی عمران خان کے پولی گرافک، فوٹو گرامیٹک اور وائس میچنگ ٹسٹ کیے جانے تھے، ملزم ٹسٹ نہیں کروائے گا تو تفتیش کیسے مکمل ہو سکتی ہے، ان ٹیسٹوں کے مکمل ہونے سے ہی پتہ چل سکتا ہے کہ یہ تمام شواہد درست ہیں یا نہیں، ٹسٹ نہ ہوئے تو تفتیش کا عمل کیسے اگے بڑھے گا۔

عمران خان کب رہا ہوں گے؟ فیصل واوڈا نے بڑی خبر دے دی

یاد رہے کہ ڈی ایس پی جاوید آصف کی سر براہی میں آنے والی 13 رکنی ٹیم نے بانی پی ٹی آئی عمران خان کے 3 ٹسٹ کرنے تھے۔

واضح رہے کہ بانی پی ٹی آئی سے تفتیش اور ٹسٹ کے لیے لاہور پولیس کی 13 رکنی ٹیم 2 دن سے راولپنڈی میں موجود ہے، تفتیشی ٹیم نے 9 مئی کے لاہور کے 11 مقدمات کے حوالے سے تفتیش کرنی تھی۔

عمران خان نے ڈیل کی تردید کی ہے، ن لیگ سے کوئی بات نہیں ہوگی، علیمہ خان

تفتیشی افسران میں انسپکٹرز محمد عالم ، ممتاز حسین ، تصدق حسین ، رانا محمد ارحم ، زاہد سلیم ، محمدفیاض ،محمد نوید ، رانا محمد اکمل، محمد سلیم سندھو شامل ہیں، ان کے ساتھ فارنزک ٹیم کے تکنیکی ماہرین میں عابد ایوب ، وقاص خالد قریشی ، عثمان احمد خالد شامل ہیں جبکہ تفتیشی ٹیم اڈیالہ جیل سے روانہ ہوگئی۔

خیال رہے کہ 15 مئی کو لاہور کی انسداد دہشت گرد عدالت نے عمران خان کے خلاف درخواست منظور کرتے ہوئے پولی گرافک اور فوٹو گرامیٹک کروانے کا حکم دیا تھا۔