بانی پی ٹی آئی سے ملاقات کی اجازت نہ ملنے پر بیرسٹر سیف وفاق پر برس پڑے

0 minutes, 0 seconds Read

خیبرپختونخوا کے مشیر اطلاعات بیرسٹر ڈاکٹر سیف نے وفاقی حکومت پر شدید تنقید کرتے ہوئے کہا ہے کہ بجٹ جیسے اہم اور قومی نوعیت کے معاملے پر بانی پی ٹی آئی سے مشاورت ناگزیر ہے، تاہم خیبرپختونخوا کی قیادت کو اپنے قائد سے ملاقات کی اجازت نہ دینا بدنیتی کی بدترین مثال ہے۔

بیرسٹر سیف نے کہا کہ ’جعلی حکومت کی بدنیتی اپنی انتہا کو پہنچ چکی ہے۔ بانی پی ٹی آئی وہ رہنما ہیں جن کے نظریے اور وژن کو عوام نے ووٹ دے کر منتخب کیا۔ بجٹ میں ان کی رائے اور وژن کو شامل کرنا آئینی، سیاسی اور اخلاقی طور پر ضروری ہے۔‘

انہوں نے مزید کہا کہ وفاقی حکومت خیبرپختونخوا کے عوام کو ان کے اصل مینڈیٹ کی سزا دے رہی ہے اور چوری شدہ مینڈیٹ پر اقتدار میں بیٹھ کر جمہوریت کا مذاق اڑا رہی ہے۔ ’یہ رویہ نہ صرف آئین کی روح کے منافی ہے بلکہ قومی یکجہتی کے بھی خلاف ہے۔‘

خیبرپختونخوا کا 2070 ارب کا بجٹ آج پیش کیا جائے گا

ڈاکٹر سیف کا کہنا تھا کہ خیبرپختونخوا کے وزیر اعلیٰ اور دیگر قیادت کو بانی پی ٹی آئی سے ملاقات سے روکنا عوامی مینڈیٹ کی توہین، عدلیہ کے فیصلوں کی کھلی خلاف ورزی اور سیاسی انتقام کی بدترین شکل ہے۔

انہوں نے مطالبہ کیا کہ خیبرپختونخوا کی قیادت کو فوری طور پر اپنے قائد سے ملاقات کی اجازت دی جائے تاکہ بجٹ میں عوام کے منتخب نمائندوں کی آواز شامل ہو اور صوبے کے عوام کے مفادات کا تحفظ کیا جا سکے۔

Similar Posts