کراچی کے علاقے آرام باغ کے مرکزی چوک پر واقع ایک عمارت کو خطرناک قرار دیا گیا ہے، جس کا اسٹرکچر مسلسل خراب ہو رہا ہے اور یہ علاقے کے مکینوں کے لیے ایک بڑا خطرہ بن چکا ہے۔ بارش یا تیز ہواؤں کے دوران عمارت کے کچھ حصے گرتے رہتے ہیں، جس کی وجہ سے آتے جاتے لوگ متعدد بار زخمی ہو چکے ہیں۔
مقامی مکینوں نے سندھ بلڈنگ کنٹرول اتھارٹی سے مطالبہ کیا ہے کہ وہ فوری طور پر اس عمارت کو گرا دے تاکہ کسی بڑے حادثے سے بچا جا سکے۔
مکینوں کا کہنا ہے کہ عمارت کا اسٹرکچر انتہائی کمزور ہو چکا ہے اور اس کے ملبے کی گراوٹ کسی بھی وقت مزید جانی نقصان کا سبب بن سکتی ہے۔
تاہم، اس معاملے پر سندھ بلڈنگ کنٹرول اتھارٹی کی جانب سے تاحال کوئی کارروائی نہیں کی گئی جس پر مکینوں میں شدید غم و غصہ پایا جاتا ہے۔
علاقے کے شہریوں نے وزیراعلیٰ سندھ اور متعلقہ حکام سے فوری طور پر عمارت کو گرانے کی اپیل کی ہے تاکہ کسی بڑے حادثے سے بچا جا سکے اور مکینوں کی زندگیوں کو خطرہ نہ ہو۔