آج نیوز کے پروگرام ”نیوز انسائیٹ وِد عامر“ میں سربراہ مسلم لیگ ضیا اعجازالحق نے افغان جہاد اور پاکستان کی ایٹمی طاقت بننے کے حوالے سے اپنے خیالات کا اظہار کیا۔ انہوں نے کہا کہ افغانستان میں لڑائی کے دوران پاکستان کی قربانیاں ہی تھی جن کی بدولت ہم آج ایٹمی طاقت بنے ہیں اور اس وقت امریکا بھی ہمارے ساتھ نہیں تھا۔
سربراہ مسلم لیگ ضیا اعجازالحق نے آج نیوز کے پروگرام نیوز انسائیٹ وِد عامر میں گفتگو کرتے ہوئے افغان جہاد اور پاکستان کی ایٹمی طاقت بننے کے حوالے سے اہم بیان دیا۔ انہوں نے کہا کہ ”ہم اپنے دشمنوں کے سامنے اسی جہاد کی وجہ سے کھڑے ہوئے، اور اس وقت کوئی ہمارے ساتھ نہیں تھا۔“
اعجازالحق نے بتایا کہ ”امریکا 1981 میں آیا جب اس نے دیکھا کہ طالبان سویت یونین کو شکست دے رہے ہیں، لیکن ایک بھی امریکی فوجی نے پاکستان اور افغانستان کی سرزمین پر قدم نہیں رکھا۔“
ان کا مزید کہنا تھا کہ ”اگر یہ قربانی نہ ہوتی تو پاکستان کبھی بھی ایٹمی طاقت نہ بن سکتا تھا۔“
انہوں نے اس بات پر بھی زور دیا کہ ”یہ وہ لوگ ہیں جو تاریخ کا علم نہیں رکھتے، جو افغان جہاد اور گیارہ ستمبر کے واقعات کا موازنہ کرتے ہیں۔“ اعجازالحق کے مطابق ”افغان جہاد ایک شخص کے نمایاں ہونے کی کاوش ہے اور اس کا اثر عالمی سطح پر تھا۔“