یونائیٹڈ بزنس گروپ کے چیئرمین ایس ایم تنویر نے پنجاب میں کمرشل پراپرٹی کے کرایہ پر 16 فیصد جی ایس ٹی عائد کرنے پر تشویش کا اظہار کیا ہے۔ انہوں نے کہا کہ یہ اقدام کاروباری لاگت میں اضافہ کرے گا اور سرمایہ کاری کے ماحول کو متاثر کرے گا۔
یونائیٹڈ بزنس گروپ (یو بی جی) کے چیئرمین ایس ایم تنویر نے پنجاب میں کمرشل پراپرٹی کے کرایہ پر 16 فیصد سیلز ٹیکس (جی ایس ٹی) عائد کرنے پر گہری تشویش کا اظہار کیا ہے۔ انہوں نے خدشہ ظاہر کیا کہ یہ نیا ٹیکس نظام کاروباری لاگت میں نمایاں اضافہ کرے گا اور پہلے ہی نازک سرمایہ کاری کے ماحول کو مزید خراب کرے گا۔
ایس ایم تنویر نے اس اقدام کو اقتصادی طور پر غیر مناسب اور قانونی طور پر ناقابل دفاع قرار دیتے ہوئے سخت تنقید کی۔ ان کا کہنا تھا کہ پنجاب میں کمرشل اسپیس کرایہ پر لینا اب ناقابل برداشت مہنگا ہو گیا ہے، جو پہلے سے جدوجہد کرنے والے ریٹیلرز اور کاروباریوں پر ناقابل برداشت بوجھ ڈالے گا، خاص طور پر ایسے وقت میں جب معاشی سرگرمیاں شدید دباؤ میں ہیں۔
انہوں نے مزید کہا کہ ایسے سخت اقدامات قانونی اور ٹیکس قوانین کی پاسداری کرنے والے کاروباروں کو غیر رسمی سیکٹر کی طرف دھکیل سکتے ہیں۔
16 فیصد سیلز ٹیکس کا نفاذ مالی نقصان کے علاوہ اس بات کی بھی علامت ہے کہ کاروبار کرنا روز بروز غیر یقینی اور خطرناک ہوتا جا رہا ہے۔ ایس ایم تنویر نے زور دیا کہ بغیر مناسب مشاورت اور اثرات کے جائزے کے اضافی ٹیکس عائد کرنے سے رسمی ریٹیل سیکٹر میں سکڑاؤ، روزگار کے مواقع میں کمی اور مقامی و بین الاقوامی سرمایہ کاروں کی دلچسپی میں کمی ہو سکتی ہے۔
انہوں نے خبردار کیا کہ موجودہ پالیسی حکومت کے معاشی بحالی، برآمدات کے فروغ اور وسیع تر ٹیکس نیٹ کے فروغ کے مقصد کو نقصان پہنچا رہی ہے۔
آخر میں انہوں نے حکومت سے درخواست کی ہے کہ اس پالیسی پر دوبارہ غور کیا جائے اور ایسے متوازن، شفاف اور کاروبار دوست اصلاحات متعارف کرائی جائیں جو سرمایہ کاری، استحکام اور طویل مدتی معاشی مضبوطی کو فروغ دیں۔