رحیم یار خان کے علاقے نواز آباد میں سرکاری اسپتال کے قریب ڈاکوؤں نے ایک خطرناک واردات کے دوران ہندو برادری سے تعلق رکھنے والے تین افراد کو اغوا کر لیا۔ مغویوں میں رانجھا تھوری، کنہیا لال اور رمیش تھوری شامل ہیں، جنہیں اسلحہ کے زور پر یرغمال بنا کر کچے کے علاقے کی طرف لے جایا گیا۔
متاثرہ خاندان کے مطابق، درجن بھر مسلح ڈاکو موٹر سائیکلوں پر سوار ہو کر رات کے وقت گھر میں داخل ہوئے۔ ڈاکوؤں نے اہل خانہ کو بندوق کے زور پر یرغمال بنایا، نقدی اور زیورات لوٹنے کے بعد تین افراد کو اغوا کر کے فرار ہو گئے۔
ڈی پی او رحیم یار خان عرفان سموں نے واقعے کا فوری نوٹس لیتے ہوئے ڈی ایس پی بھونگ کی قیادت میں پولیس کی بھاری نفری کو کچے کے علاقے کی جانب روانہ کر دیا۔ پولیس ترجمان کے مطابق کچے میں داخلے کے تمام راستوں کی ناکہ بندی کر دی گئی ہے اور سرچ آپریشن تیزی سے جاری ہے۔
ترجمان کا کہنا ہے کہ مغویوں کی بحفاظت بازیابی کے لیے تمام وسائل بروئے کار لائے جا رہے ہیں اور جلد ہی ملزمان کو قانون کی گرفت میں لایا جائے گا۔
واقعے کے بعد علاقے میں شدید خوف و ہراس پھیل گیا ہے جبکہ ہندو اقلیتی برادری نے اس سنگین واردات پر گہری تشویش کا اظہار کیا ہے۔