نیشنل ڈیزاسٹر مینجمنٹ اتھارٹی (این ڈی ایم اے) نے ملک کے مختلف حصوں میں 28 جولائی سے 31 جولائی تک شدید بارشوں، طغیانی، لینڈ سلائیڈنگ اور سیلاب کے خدشے کے پیش نظر الرٹ جاری کردیا۔
تفصیلات کے مطابق این ڈی ایم اے نے ملک کے بیشتر علاقوں کے لیے ممکنہ موسمی صورتحال پر الرٹ جاری کردیا، پنجاب، خیبرپختونخوا، گلگت بلتستان اور آزاد کشمیر میں 28 تا 31 جولائی تک ممکنہ بارشوں کے باعث سیلاب اور لینڈ سلائیڈنگ کا الرٹ جاری کیا گیا۔
الرٹ کے مطابق پنجاب کے اضلاع بشمول سرگودھا، حافظ آباد، گوجرانوالہ، گجرات، سیالکوٹ، فیصل آباد، لاہور اور نارووال کے علاقوں میں شدید بارشیں متوقع ہیں جبکہ جنوبی پنجاب کے اضلاع ڈیرہ غازی خان، راجن پور اور رحیم یار خان میں درمیانے درجے کی بارشیں اور پہاڑی علاقوں کے برساتی نالوں میں تیز بہاؤ متوقع ہے۔
الرٹ کے مطابق پیر پنجال پہاڑی سلسلے سے نکلنے والے نالوں میں پانی کے بہاؤ میں درمیانے درجے کا اضافہ متوقع ہے جبکہ خیبرپختونخوا کے اضلاع کوہستان، سوات، ملاکنڈ، دیر، بونیر اور کے ملحقہ ندی نالوں اور دریاؤں میں طغیانی کاخدشہ ہے۔
الرٹ کے مطابق دریائے سوات، پنجکوڑہ، بارہ اور کلپانی نالہ میں پانی کی سطح بلند ہونے سے دریائے کابل میں نوشہرہ کے مقام پر بہاؤ میں اضافہ متوقع ہے جبکہ چترال، بونی اور ریشون میں گلیشئرپگھلنے اورممکنہ بارشوں سے دریائے چترال کے بہاؤ میں اضافہ ہو سکتا ہے۔
اسی طرح گلگت، اسکردو، ہنزہ، شگر، مظفرآباد، وادی نیلم اور باغ میں بارشوں کے باعث لینڈ سلائیڈنگ اور ندی نالوں میں سیلاب کا خدشہ ہے جبکہ مظفرآباد، باغ، پشاور، مردان، نوشہرہ اور ایبٹ آباد کے شہری علاقوں میں سیلابی صورتحال متوقع ہے۔
این ڈی ایم اے کی جانب سے تمام متعلقہ اداروں کوممکنہ صورتحال کے پیش نظر پیشگی اقداما ت کی ہدایت جاری کر دی گئی ہیں کہ تمام ادارے ہنگامی حالات سے نمٹنے کے لیے اہلکار، مشینری اور ریسکیو ٹیمیں تیار رکھیں۔ مقامی انتظامیہ اور پی ڈی ایم ایز کو ہنگامی صورتحال سے نمٹنے اور بروقت اقدامات کی ہدایت بھی جاری کی گئی ہیں۔