پاکستان اسٹاک ایکسچینج (پی ایس ایکس) میں تیزی کا سلسلہ بدستور جاری ہے، جہاں سرمایہ کاروں کا اعتماد اور معاشی اشاریوں میں بہتری مارکیٹ کو نئے ریکارڈز کی طرف لے جا رہی ہے۔ بدھ کے روز کاروباری دن کے آغاز سے ہی مارکیٹ میں زبردست تیزی دیکھنے میں آئی، اور ہنڈریڈ انڈیکس ایک لاکھ 45 ہزار پوائنٹس کی تاریخی سطح پر جا پہنچا۔
دوپہر کے وقت 12 بج کر15 منٹ کے قریب ہنڈریڈ انڈیکس 1 ہزار101 پوائنٹس کے اضافے کے ساتھ 1 لاکھ 44 ہزار 68 اعشاریہ 138 پر ٹریڈ کر رہا تھا، جبکہ کاروباری دن کے اختتام پر یہ 1 لاکھ 45 ہزار 88 پوائنٹس پر بند ہوا۔
ماہرین کے مطابق، موجودہ تیزی کی لہر کو سرمایہ کاروں کے مثبت رویے، سازگار معاشی اشاریوں اور سیاسی منظرنامے میں نسبتی استحکام نے تقویت دی ہے۔ خاص طور پر آٹو موبائل اسمبلرز، کمرشل بینک، آئل اینڈ گیس ایکسپلوریشن کمپنیوں، آئل مارکیٹنگ کمپنیوں (او ایم سیز) اور ریفائنریز کے شعبے میں زبردست خریداری دیکھی گئی۔
نمایاں طور پر انڈیکس میں بھاری وزن رکھنے والے شیئرز جیسے کہ اے آر ایل، او جی ڈی سی، پی او ایل، ایس این جی پی ایل، ایس ایس جی سی، ایم سی بی، میزان بینک اور یو بی ایل سبز زون میں ٹریڈ کرتے رہے۔
یاد رہے کہ ایک روز قبل منگل کو بھی مارکیٹ نے اپنا تاریخی ریلی کا تسلسل برقرار رکھتے ہوئے 985 پوائنٹس کے اضافے کے ساتھ 1 لاکھ 43 ہزار 37 اعشاریہ 17 پر بند ہو کر نیا ریکارڈ قائم کیا تھا۔