وزیراعظم شہبازشریف سے پاکستان پیپلز پارٹی کے چیئرمین بلاول بھٹو زرداری کی ملاقات ہوئی ہے، جس میں پی ٹی آئی کی خالی نشستوں پر ضمنی الیکشن پر غور کیا گیا جبکہ پیپلزپارٹی اور (ن) لیگ کے درمیان اتحادی معاملات پر بھی گفتگو ہوئی۔
تفصیلات کے مطابق جمعے کے روز چیئرمین پیپلز پارٹی بلاول بھٹو زرداری نے وفد کے ہمراہ وزیراعظم شہبازشریف سے ملاقات کی ہے۔ ملاقات کے دوران دونوں رہنماؤں نے ملک میں جاری سیاسی اور امن و امان کی صورتحال پر مشاورت کی ہے۔
ذرائع کے مطابق ملاقات میں وزیراعظم اور بلاول بھٹو زرداری نے پاکستان پیپلز پارٹی اور مسلم لیگ (ن) کے درمیان اتحادی معاملات اور متوقع ضمنی انتخابات کے بارے میں بھی گفتگو کی ہے۔
وزیراعظم شہباز شریف سے بلاول بھٹو کی ملاقات کا اعلامیہ جاری
دوسری جانب وزیراعظم شہباز شریف سے بلاول بھٹو کی ملاقات کا اعلامیہ جاری کردیا گیا ہے۔ جس کے مطابق سینیٹر شیری رحمان اور رکن قومی اسمبلی آصفہ بھٹو زرداری بھی بلاول بھٹو زرداری کے ہمراہ تھیں۔
اعلامیے کے مطابق بلاول بھٹو زرداری نے وزیراعظم سے ان کے کزن میاں شاہد شفیع کے انتقال پر اظہار تعزیت کیا، مرحوم کی بلندی درجات اور اہل خانہ کے لیے صبر و جمیل کی دعا کی۔
بلاول بھٹو کا مرحوم میاں شاہد شفیع کے بڑے بھائی سے رابطہ
ادرھر چیئرمین پیپلز پارٹی بلاول بھٹو زرداری نے مرحوم میاں شاہد شفیع کے بڑے بھائی جاوید شفیع سے بھی ٹیلی فون پر رابطہ کیا اور تعزیت کی۔
ملاقات میں نائب وزیراعظم و وزیر خارجہ اسحاق ڈار، وفاقی وزیر اطلاعات و نشریات عطاء اللہ تارڑ، وفاقی وزیر پبلک افیئرز یونٹ رانا مبشر اقبال ، وزیراعظم کے مشیر برائے سیاسی امور رانا ثناء اللہ موجود تھے۔
وزیر مملکت برائے غذائی تحفظ و تحقیق ملک رشید احمد صدیقی وزیر مملکت برائے پاور ڈویژن عبدالرحمان کانجو ،رکن قومی اسمبلی سائرہ افضل تارڑ ، سپیکر پنجاب اسمبلی ملک احمد خان اور وزیر اعظم کے معاون خصوصی طلحہ برکی بھی ملاقات میں شریک ہوئے۔