ممبئی میں ہونے والی حالیہ موسلا دھار بارشوں نے جہاں عام زندگی کو درہم برہم کر دیا، وہیں فلمی دنیا کے بڑے ستارے بھی اس قدرتی آفت سے محفوظ نہ رہ سکے۔ سپر اسٹار امیتابھ بچن کا مشہور زمانہ جوہو بنگلہ ”پرتیکشا“ بھی زیرِ آب آ گیا ہے اور اس کے اندر تک پانی بھر جانے کی ویڈیوز سوشل میڈیا پر وائرل ہو چکی ہیں۔
ایک ویڈیو میں دیکھا جا سکتا ہے کہ پرتیکشا کے باہر اور اندرونی احاطے میں گھٹنوں تک پانی جمع ہو چکا ہے۔ ویڈیو میں ایک شخص کہتا ہے، ”پیسہ ہو یا شہرت، ممبئی کی بارش کسی کو نہیں بخشتی۔ نہ امبانی، نہ ہی امیتابھ بچن!“
یہ ویڈیو اس وقت ریکارڈ کی گئی جب بارش کے پانی نے سڑک سے ہوتے ہوئے سیدھا بنگلے کے اندر داخل ہونا شروع کر دیا۔ ویڈیو میں ایک کار بھی پانی میں پھنسی ہوئی دیکھی جا سکتی ہے، اور جب ویڈیو بنانے والا سیکیورٹی کی جانب بڑھتا ہے تو اسے فوراً وہاں سے نکال دیا جاتا ہے۔
یہ تاریخی بنگلہ جو ممبئی کے جوہو علاقے میں واقع ہے، امیتابھ بچن کی زندگی کا ایک اہم حصہ رہا ہے۔ حالیہ ویڈیو میں دیکھا جا سکتا ہے کہ سڑک سے لے کر بنگلے کے اندرونی حصے تک پانی ہی پانی ہے، اور بارش کے باعث پورا علاقہ پانی میں ڈوبا ہوا ہے۔
وائرل ویڈیو میں ایک شخص کہتے ہوئے سنائی دیتا ہے، ”دیکھو یہاں کتنا پانی جمع ہو گیا ہے۔“
وہ مزید دعویٰ کرتا ہے کہ امیتابھ بچن خود وائپر لے کر باہر نکلے اور پانی صاف کرنے میں مدد دی۔
اس شخص نے یہ بھی کہا، ”چاہے آپ کے پاس کتنی ہی دولت ہو، چاہے آپ ہزاروں کروڑ کے مالک ہوں، ممبئی کی بارش سے کوئی نہیں بچ سکتا۔نہ امبانی، نہ امیتابھ بچن!“
بتاتے چلیں کہ یہ بنگلہ امیتابھ بچن اور جیا بچن کو معروف فلمساز رمیش سپی نے فلم ”شعلے“ کی شاندار کامیابی کے بعد تحفے میں دیا تھا۔ امیتابھ بچن نے یہ گھر 1976 میں خریدا تھا، اور آج اس کی مالیت 50 کروڑ روپے سے زیادہ بتائی جاتی ہے۔
یہ بنگلہ بچن خاندان کے لیے جذباتی اہمیت بھی رکھتا ہے، کیونکہ ان کے دونوں بچے شویتا بچن اور ابھیشیک بچن اسی گھر میں پیدا ہوئے تھے۔ اس گھر کا نام ”پرتیکشا“ امیتابھ بچن کے والد، مشہور شاعر ہری ونش رائے بچن نے رکھا تھا۔
کچھ عرصہ قبل امیتابھ بچن نے یہ بنگلہ اپنی بیٹی شویتا بچن کو تحفے میں دیا تھا۔فی الحال یہ گھر شویتا بچن کے زیرِ استعمال ہے۔
حالیہ بارش کے باعث ممبئی اور گرد و نواح کے علاقوں جیسے تھانے، رائےگڑھ، رتناگری اور پالگھر میں ریڈ الرٹ جاری کیا گیا ہے۔ مقامی ٹرینیں، ہوائی پروازیں اور سڑکوں پر ٹریفک بری طرح متاثر ہوا ہے۔ بارش کا سلسلہ 21 اگست تک جاری رہنے کی پیش گوئی کی گئی ہے۔