نائب وزیراعظم اور وزیر خارجہ اسحاق ڈار اسلامی تعاون تنظیم (او آئی سی) وزرائے خارجہ کونسل کے غیرمعمولی اجلاس میں شرکت کے لیے 25 اگست کو سعودی عرب روانہ ہوں گے۔
ترجمان دفتر خارجہ کے مطابق وزیر خارجہ اسحاق ڈار 25 تا 26 اگست 2025 کو سعودی عرب کا 2 روزہ دورہ کریں گے۔ وہ جدہ میں اسلامی تعاون تنظیم (او آئی سی) وزرائے خارجہ کونسل کے غیر معمولی اجلاس میں شرکت کریں گے۔
نائب وزیراعظم ڈھاکا میں اپنے 2 روزہ دورہ مکمل کرنے کے بعد براہِ راست جدہ روانہ ہوں گے تاکہ اس اعلیٰ سطحی اجلاس میں شریک ہو سکیں۔
وزرائے خارجہ کونسل کے غیر معمولی اجلاس میں رکن ممالک کے وزرائے خارجہ اور اعلیٰ حکام شرکت کریں گے، جس میں فلسطین کی سنگین صورتحال پر مشترکہ ردعمل پر غور کیا جائے گا، جو جاری اسرائیلی فوجی جارحیت، غزہ پر مکمل فوجی کنٹرول کے مجوزہ منصوبوں اور فلسطینی عوام کے حقوق کی مسلسل سنگین خلاف ورزیوں کے نتیجے میں پیدا ہوئی ہے۔
دفتر خارجہ کے مطابق پاکستان ایک پُرعزم حامی کے طور پر فلسطینی مسئلے کو ہمیشہ بین الاقوامی فورمز پر اجاگر کرتا رہا ہے۔ آئندہ غیر معمولی اجلاس میں نائب وزیرِاعظم و وزیرِ خارجہ فلسطین کے ساتھ پاکستان کی غیر متزلزل حمایت کو دہراتے ہوئے اپنے اصولی مؤقف کو پیش کریں گے۔
دفتر خارجہ کے مطابق وزیر خارجہ اسرائیل سے تمام مقبوضہ فلسطینی علاقوں سے مکمل انخلا کا مطالبہ کریں گے، غزہ پر مکمل فوجی کنٹرول کے اسرائیلی منصوبے اور فلسطینیوں کی مزید بے دخلی کو یکسر مسترد کریں گے۔
وزیرخارجہ اسحٰق ڈار اجلاس میں ہنگامی بنیادوں پر بلا روک ٹوک انسانی امداد کی فراہمی پر زور دیں گے، اور فلسطینی عوام کے جائز حقوق کی بحالی کی ضرورت، اور بالخصوص ایک آزاد اور خودمختار فلسطینی ریاست کے قیام کا مطالبہ کریں گے جو جون 1967 سے قبل کی سرحدوں پر مبنی ہو اور جس کا دارالحکومت القدس الشریف ہو۔
وزرائے خارجہ کونسل کے اجلاس کے موقع پر نائب وزیرِاعظم و وزیرِ خارجہ کی رکن ممالک کے اہم وزرائے خارجہ کے ساتھ دوطرفہ ملاقاتیں بھی متوقع ہیں۔