اسلام آباد میں شدید بارش کے باعث ندی نالے بپھر گئے ہیں اور کئی مقامات پر سڑکیں تالاب کا منظر پیش کر رہی ہیں۔ پانی کے بھراؤ کے باعث متعدد گاڑیاں سڑکوں پر بند ہو گئیں، جبکہ شہریوں کو شدید مشکلات کا سامنا ہے۔
اسلام آباد اور راولپنڈی میں موسلادھار بارش کا سلسلہ وقفے وقفے سے جاری ہے جس کے باعث شہری زندگی شدید متاثر ہو رہی ہے۔
محکمہ موسمیات کے مطابق اسلام آباد کے علاقوں سیدپور میں 40 ملی میٹر اور گولڑہ میں 66 ملی میٹر بارش ریکارڈ کی گئی ہے۔
راولپنڈی کے علاقوں شمس آباد میں 25 ملی میٹر، کچہری اور چکلالہ میں 5 ملی میٹر، پیرودھائی میں 35 ملی میٹر، گوالمنڈی میں 5 ملی میٹر اور نیو کٹاریاں میں 60 ملی میٹر بارش ریکارڈ کی گئی ہے۔
شدید بارش کے باعث برساتی نالے بپھر گئے ہیں۔ نالہ لئی سمیت شہر بھر کے دیگر نالوں کی مسلسل مانیٹرنگ کی جا رہی ہے۔
ایم ڈی واسا کے مطابق نالوں میں پانی کی سطح خطرناک حد تک بلند ہو چکی ہے۔ نالہ لئی میں کٹاریاں کے مقام پر پانی کی سطح 15.7 فٹ تک جا پہنچی ہے، جو خطرے کی حد کے قریب تصور کی جا رہی ہے۔
کٹاریاں اور گوالمنڈی کے اطراف نشیبی علاقوں میں انخلا کی کارروائیاں جاری ہیں، جبکہ متعلقہ اداروں کو ہائی الرٹ کر دیا گیا ہے۔ ریسکیو ٹیمیں متحرک ہیں تاکہ کسی بھی ہنگامی صورتحال میں فوری کارروائی کی جا سکے۔
محکمہ موسمیات نے آئندہ چند روز تک مزید بارشوں کی پیشگوئی کی ہے۔ شہریوں کو ہدایت کی گئی ہے کہ وہ ندی نالوں کے قریب جانے سے گریز کریں اور موسم کی صورتحال سے باخبر رہیں۔ ضلعی انتظامیہ نے شہریوں سے تعاون کی اپیل کی ہے تاکہ ممکنہ جانی و مالی نقصان سے بچا جا سکے۔
محکمہ موسمیات نے کشمیر، مری، ایبٹ آباد اور مانسہرہ میں بارش کی پیش گوئی کی ہے ،،مظفرآباد، پو نچھ، باغ اور حویلی میں تیز ہواؤں کے ساتھ بارش متوقع ہے۔