ایشیا کپ ٹی 20 کے پانچویں میچ میں بنگلہ دیش نے سری لنکا کو جیت کے لیے 140 رنز کا ہدف دے دیا ہے۔
ہفتے کے روز ابو ظہبی کے شیخ زاید کرکٹ اسٹیڈیم میں اے سی سی مینرز ایشیا کپ 2025 کے پانچویں میچ میں گروپ بی سے بنگلہ دیش اور سری لنکا کی ٹیمیں مدمقابل ہیں۔
سری لنکا کی دعوت پر پہلے بیٹنگ کرتے ہوئے بنگلہ دیش کی ٹیم نے مقررہ 20 اوورز میں 5 وکٹوں کے نقصان پر 139 رنز بنائے اور سری لنکا کو جیت کے لیے 140 رنز کا ہدف دیا۔
بنگلہ دیش کی بیٹنگ
سری لنکا نے ٹاس جیت کر پہلے فیلڈنگ کا فیصلہ کیا جو ابتدا میں کامیاب ثابت ہوا، بنگلہ دیش کی بیٹنگ لائن اپ اننگز کے آغاز میں مشکلات کا شکار رہی۔
دونوں اوپنرز تنزید حسن اور پرویز حسین بغیر کوئی رن بنائے آؤٹ ہوئے، ابتدائی جھٹکوں کے بعد کپتان لٹن داس نے 28 رنز کی اننگز کھیلی لیکن وہ بھی بڑی شراکت قائم نہ کر سکے۔
درمیانی اوورز میں توحید ہری دَے صرف 8 رنز پر رن آؤٹ ہوئے جب کہ ماحدی حسن 9 رنز بنا کر ایل بی ڈبلیو ہو گئے، اس موقع پر مڈل آرڈر کے بلے باز جاکر علی اور شمیم حسین نے ذمہ دارانہ بیٹنگ کا مظاہرہ کیا اور ٹیم کو سنبھالا دیا۔
جاکر علی نے 34 گیندوں پر 41 رنز کی شاندار ناقابلِ شکست اننگز کھیلی جب کہ شمیم حسین نے 34 گیندوں پر 42 رنز بنا کر ٹیم کے اسکور کو مستحکم کیا، دونوں بلے بازوں کے درمیان قیمتی 86 رنز کی شراکت داری نے بنگلہ دیش کو قابلِ دفاع اسکور تک پہنچایا۔
اس طرح بنگلہ دیش کا مقررہ 20 اوورز میں 6.95 رن ریٹ کی اوسط سے مجموعی اسکور 139 رنز رہا اور یوں سری لنکا کو جیت کے لیے 140 رنز کا آسان ہدف ملا۔
سری لنکا کے بولرز میں وانندو ہسارنگا سب سے نمایاں رہے، انہوں نے 25 رنز کے عوض 2 وکٹیں حاصل کیں۔ اس کے علاوہ نوان تھشارا اور دشمنتھا چمیرا نے ایک، ایک کھلاڑی کو آؤٹ کیا جبکہ شاناکا اور پتھیرانا کو کوئی وکٹ نہ مل سکی۔
میچ کا ٹاس
سری لنکا کے کپتان چرِتھ اسالنکا نے ٹاس جیت کر بنگلہ دیش کو پہلے بیٹنگ کرنے کی دعوت دی ہے۔
ٹاس کے بعد بنگلہ دیشی کپتان لٹن داس نے کہا کہ وہ بیٹنگ کے فیصلے سے خوش ہیں کیوں کہ وکٹ بیٹنگ کے لیے سازگار لگ رہی ہے۔ ان کا کہنا تھا کہ ٹیم اپنے پہلے میچ کی کارکردگی سے حوصلہ لے کر میدان میں اترے گی۔
دوسری جانب سری لنکن کپتان چرِتھ اسالنکا نے بتایا کہ پہلے فیلڈنگ کا فیصلہ پچ کی تازگی کو دیکھتے ہوئے کیا گیا ہے۔ انہوں نے کہا کہ ٹیم 7-4 کمبینیشن کے ساتھ کھیل رہی ہے جس میں 3 آل راؤنڈرز شامل ہیں جب کہ انہوں نے تصدیق کی کہ آل راؤنڈر ونیندو ہسارنگا ٹیم میں واپسی کر چکے ہیں۔
بنگلہ دیش کا اسکواڈ
بنگلہ دیش کی ٹیم میں لٹن داس (کپتان، وکٹ کیپر)، تنزید حسن، پرویز حسین ایمان، سیف حسن، توحید ہردوئے، جاکر علی، شمیم حسین، نرول حسن، ماہدی حسن، رشاد حسین، ناصم احمد، مصطفیض الرحمان، تنزیم حسن، تسکین احمد، شوریف الاسلام اور محمد سیف الدین شامل ہیں۔
سری لنکا کا اسکواڈ
سری لنکا کی ٹیم میں چرِتھ اسالنکا (کپتان)، پاتھم نسانکا، کوشل مینڈس، کوشل پریرا، نووانیدو فرنینڈو، کامندو مینڈس، کامل مشارا، داسن شاناکا، ونیندو ہسارنگا، دُنتھ وِلا لے گے، چمیکا کرونارتنے، مہیش تھکشانا، دُشمنتھا چمیرا، بینورا فرنینڈو، نووان تُھشرا اور متھیسا پتھیرانا شامل ہیں۔
ٹی 20 کرکٹ میں دونوں ٹیمیں اب تک 20 مرتبہ آمنے سامنے آ چکی ہیں، جن میں سری لنکا نے 12 اور بنگلہ دیش نے 8 میچ جیتے ہیں۔
مردوں کے ٹی 20 ایشیا کپ میں دونوں ٹیموں کے درمیان اب تک 2 میچ کھیلے گئے ہیں، جن میں ایک ایک جیت دونوں ٹیموں کے حصے میں آئی۔
واضح رہے کہ سری لنکا ٹیم ایشیا کپ میں اپنا پہلا میچ کھیلی رہی ہے جب کہ بنگلا دیش نے اپنے پہلے مقابلے میں ہانگ کانگ کو 7 وکٹوں سے شکست دے کر گروپ بی میں دوسری پوزیشن پر قبضہ جمایا ہوا ہے۔