ایشیا کپ میں پاک بھارت میچ کے بعد پریزینٹیشن سیریمنی میں متنازع اور سیاسی بیان دے کر بھارتی کرکٹ ٹیم کے کپتان سوریا کمار یادو بڑی مشکل میں پھنس گئے ہیں۔
بھارتی میڈیا کے مطابق پاکستان کرکٹ بورڈ کی شکایت پر انٹرنیشنل کرکٹ کونسل (آئی سی سی) نے معاملے کا نوٹس لیتے ہوئے بھارتی کپتان کے خلاف کارروائی کا عندیہ دیا ہے۔
پاکستان کی جانب سے جمع کرائے گئے شواہد کا جائزہ لینے کے بعد سوریا کمار کے خلاف کارروائی کی سفارش بھی کی گئی ہے۔
بھارتی میڈیا رپورٹ میں بتایا گیا ہے کہ پاکستان کے خلاف گروپ اسٹیج میں کھیلے گئے میچ کے بعد سوریا کمار یادیو نے سیاسی زبان استعمال کرنے پر پاکستان نے باضابطہ طور پر آئی سی سی میں شکایت درج کرائی تھی، اس معاملے کی نگرانی میچ ریفری رچی رچرڈسن کر رہے ہیں جنہوں نے بھارتی ٹیم مینجمنٹ کو ای میل ارسال کردی ہے۔
بھارتی میڈیا کا کہنا ہے کہ ای میل میں میچ ریفری رچی رچرڈسن نے واضح طور پر لکھا ہے کہ سوریا کمار نے کھیل کے مفاد کے خلاف غیر مناسب ریمارکس دیے جس سے ظاہر ہوتا ہے کہ بھارتی کپتان نے کھیل کی ساکھ کو نقصان پہنچایا ہے۔
بھارتی میڈیا کے مطابق آئی سی سی پاکستان کی شکایت کا جائزہ لے رہا ہے اور جلد اس کی باضابطہ سماعت ہوگی جبکہ پاکستان کی جانب سے اس حوالے سے 2 آفیشل رپورٹس ملی ہیں۔
بھارتی میڈیا کا مزید کہنا ہے کہ سوریا کمار یادیو کے خلاف باضابطہ کارروائی کے امکانات بڑھ گئے ہیں۔
واضح رہے کہ بھارتی کپتان سوریا کمار نے ایشیا کپ کے گروپ اسٹیج میچ میں جیت کے بعد پریزنٹیشن میں گفتگو کرتے ہوئے پہلگام واقعے کا ذکر کرتے ہوئے متنازع بات کی تھی۔
واضح رہے کہ ایشیا کپ کے سپر 4 مرحلے کے چوتھے میچ میں بھارت نے بنگلادیش کو 41 رنز سے شکست دے کر فائنل کے لیے کوالیفائی کرلیا ہے، جبکہ پاکستان کا مقابلہ آج بنگلادیش سے ہے۔