ریجنل ٹرانسپورٹ منسٹرز کانفرنس سے خطاب کرتے ہوئے وزیراعظم نے خطے میں امن اور ترقی کے فروغ کے لیے معاشی اور تجارتی روابط بڑھانے پر زور دیتے ہوئے دیگر ممالک کو سی پیک سے بھرپور فائدہ اٹھانے کی ترغیب دی اور کہا کہ سی پیک خطے میں مثبت تبدیلی کا سبب بن رہا ہے۔
ان کا کہنا تھا کہ گوادر کو چین کے صوبے شنگیانگ سے جوڑنے سے ترقی اور توانائی کے شعبوں میں تعاون کی نئی راہیں کھل رہی ہیں۔
وزیر اعظم نے مزید کہا کہ یہ تعاون نہ صرف تمام فریقین کے لیے فائدہ مند ہوگا بلکہ خطے میں امن اور ترقی کی مشترکہ کوششوں کو بھی تقویت دے گا۔
انہوں نے کہا کہ علاقائی روابط میں اضافے سے معاشی اور تجارتی شعبوں میں انقلاب آئے گا اور یہ روابط صرف سڑک، ریل یا فضائی راستوں تک محدود نہیں، بلکہ ڈیجیٹل انفراسٹرکچر میں سرمایہ کاری بھی انتہائی اہم ہے۔
وزیراعظم نے کہا کہ پاکستان اس میدان میں سرمایہ کاری کر رہا ہے تاکہ چوتھے صنعتی انقلاب سے بھرپور فائدہ اٹھایا جا سکے۔
شہباز شریف نے کہا کہ بلوچستان رقبے کے لحاظ سے پاکستان کا سب سے بڑا صوبہ ہے، االہ نے بلوچستان کو بے شمار قدرتی وسائل سے نوازا ہے، یہاں کی تاریخ ، روایت اور ثقافت اسے منفرد بناتی ہے ، بلوچ عوام ہمشہ کشادہ دل اور مہمان نواز رہے ہیں۔
وزیر اعظم نے کہا کہ بلوچ رہنماؤں نے رضاکارانہ طور پہ پاکستان سے الحاق کا فیصلہ کیا اللہ نے بلوچستان کو بے شمار قدرتی وسائل سے نوازا افسوس بلوچستان کی دولت ابھی بھی زمین کے اندر دفن ہے۔