ہانگ کانگ سکسز: یو اے ای نے دفاعی چیمپئن پاکستان کو شکست دے دی

ہانگ کانگ سکسز ٹورنامنٹ کے افتتاحی میچ میں متحدہ عرب امارات (یو اے ای) نے سنسنی خیز مقابلے کے بعد دفاعی چیمپئن پاکستان کو ایک وکٹ سے شکست دے کر بڑا اپ سیٹ کردیا۔

ہانگ کانگ سکسز ٹورنامنٹ کے افتتاحی میچ میں یو اے ای نے پاکستان کی جانب سے دیا گیا 107 رنز کا ہدف مقررہ 6 اوورز میں 5 وکٹوں کے نقصان پر حاصل کرلیا۔

یو اے ای نے آخری اوورز میں جارحانہ بیٹنگ کا مظاہرہ کرتے ہوئے پاکستان کو ایک وکٹ سے شکست دی۔

یو اے ای کے کپتان خالد شاہ نے پاکستانی بولرز کے خلاف دھواں دھار بیٹنگ کرتے ہوئے صرف 20 گیندوں پر 71 رنز کی اننگز کھیلی۔ ان کی اننگز میں 3 چوکے اور 9 چھکے شامل تھے۔

زاہد علی نے بھی 8 گیندوں پر 22 رنز بنا کر ٹیم کی فتح میں اہم کردار ادا کیا۔

پاکستان کی جانب سے عباس آفریدی، عبدالصمد اور عرفان خان نے ایک، ایک وکٹ حاصل کی۔

اس سے قبل پاکستان نے ٹاس جیت کر پہلے بیٹنگ کا فیصلہ کیا اور مقررہ 6 اوورز میں 3 وکٹوں کے نقصان پر 106 رنز بنائے۔

پاکستانی کپتان عباس آفریدی نے جارحانہ بیٹنگ کرتے ہوئے صرف 13 گیندوں پر 53 رنز اسکور کیے۔ ان کی اننگز میں ایک چوکا اور 8 چھکے شامل تھے۔

عبدالصمد نے بھی عمدہ بیٹنگ کا مظاہرہ کیا اور 15 گیندوں پر 39 رنز کی ناقابل شکست اننگز کھیلی، تاہم پاکستانی بلے بازوں کی یہ کوشش ٹیم کو شکست سے نہ بچا سکی۔