علامہ اقبال کے فکری ورثے کو نئی نسل تک منتقل کرنا ضروری ہے: سفیر رضوان شیخ

امریکا میں پاکستان کے سفارت خانے میں مفکرِ پاکستان علامہ محمد اقبال کی 150 ویں یومِ ولادت کے موقع پر ایک پروقار اور فکری تقریب کا انعقاد کیا گیا، جس میں پاکستان کے قومی وجود، فکری اساس اور فلسفہ خودی میں شاعرِ مشرق کے لازوال کردار پر روشنی ڈالی گئی۔

بزمِ حرف و سخن اور انٹرنیشنل اکیڈمی آف لیٹرز کے اشتراک سے منعقدہ اس تقریب میں امریکہ میں متعین پاکستانی سفیر رضوان سعید شیخ، سرکردہ پاکستانی کمیونٹی رہنماؤں، میڈیا نمائندگان، نامور شعراء اور زندگی کے مختلف شعبہ جات سے تعلق رکھنے والے افراد نے بڑی تعداد میں شرکت کی۔

تقریب سے خطاب کرتے ہوئے سفیرِ پاکستان رضوان سعید شیخ نے کہا کہ علامہ اقبال کی بصیرت افروز شاعری اور افکار کے ہماری قومی تاریخ اور شناخت پر انمٹ نقوش ثبت ہیں اور ہماری قومی زندگی کی فکری بنیادیں ان ہی کی بصیرت سے وابستہ ہیں۔

انہوں نے کہا کہ نوآبادیاتی دور میں جب برصغیر کے مسلمان فکری اور ذہنی پابندیوں کا شکار تھے، علامہ اقبال نے اپنے نظم و نثر کے ذریعے ان میں خودی، خود مختاری اور خود ارادیت کا احساس بیدار کیا۔

انہوں نے واضح کیا کہ اقبال کا تصورِ خودی خود شناسی، بامقصد جدوجہد اور روحانی آزادی کے ذریعے اقوام کو اپنی تقدیر بدلنے کا درس دیتا ہے، جبکہ ان کا تصورِ شاہین نوجوانوں کے لیے جرأت اور بلند مقاصد کے حصول کی مشعلِ راہ ہے۔

سفیرِ پاکستان نے اس عزم کا اظہار کیا کہ حکومتِ پاکستان علامہ اقبال کی 150 ویں سالگرہ کی مناسبت سے فکرِ اقبال کو تعلیمی اداروں، قومی مباحث اور قومی ترجیحات کا مؤثر حصہ بنانے کے لیے پرعزم ہے۔

انہوں نے اس بات پر زور دیا کہ اس درخشاں فکری ورثے کو نئی نسل تک منتقل کرنا وقت کی اہم ضرورت ہے۔

رضوان سعید شیخ نے مزید کہا کہ علامہ اقبال نے جس پرامن، خوشحال اور متحد پاکستان کا خواب دیکھا تھا اور جو قائدِ اعظم کی قیادت میں شرمندہ تعبیر ہوا، اس کی تعمیر و ترقی کے لیے جدوجہد جاری رکھنے کی تجدید کی ضرورت ہے۔

تقریب کے دوران دیگر مقررین نے بھی اپنے خیالات کا اظہار کرتے ہوئے کہا کہ علامہ اقبال نے 1930 کے خطبہ الہ آباد کے ذریعے برصغیر کے مسلمانوں کے لیے ایک علیحدہ اور آزاد مملکت کا خاکہ پیش کیا، جس نے بعد ازاں قیامِ پاکستان کی شکل اختیار کی اور مسلم قوم کو اپنے سیاسی و معاشی حقوق کے تحفظ کا راستہ دکھایا۔

مقررین کے مطابق علامہ اقبال کا ادبی ورثہ صرف اسرارِ خودی، رموزِ بے خودی یا بانگِ درا تک محدود نہیں بلکہ فلسفہ، مذہب، روحانیت اور آزادی کے گہرے مباحث پر محیط ہے۔

اس موقع پر ”اقبال کی شاعری اور عصرِ حاضر کے تقاضے“ کے عنوان سے ایک خصوصی پینل ڈسکشن کا بھی اہتمام کیا گیا، جبکہ شکاگو کی صادقین گیلری کی جانب سے کلامِ اقبال پر مبنی تصویری نمائش اور ایک خصوصی ویڈیو پیش کی گئی جسے حاضرین نے حد درجہ سراہا۔

تقریب کے اختتام پر نامور شعراء نے اپنے کلام کے ذریعے علامہ اقبال کو خراجِ تحسین پیش کیا، جبکہ تقریب کی نظامت کے فرائض فرسٹ سیکرٹری افراح طارق نے انجام دیے۔