عمران خان کی بشریٰ بی بی کے ہمراہ وکلا سے ملاقات کی تفصیل سامنے آگئی

پاکستان تحریک انصاف (پی ٹی آئی) کے بانی عمران خان سے ان کے وکلا نے بدھ کو راولپنڈی کی اڈیالہ جیل میں طویل ملاقات کی ہے۔ ذرائع کے مطابق ملاقات میں عمران خان کی اہلیہ بشریٰ بی بی بھی موجود تھیں۔

جیل ذرائع کے مطابق بیرسٹر سلمان صفدر اور سردار لطیف کھوسہ نے عمران خان سے جیل کے کانفرنس روم میں ملاقات کی۔ اس دوران زیرِ سماعت مقدمات، مختلف قانونی درخواستوں اور آئندہ کی قانونی حکمت عملی پر تفصیلی تبادلہ خیال کیا گیا۔

ذرائع کا کہنا ہے کہ وکلا نے بشریٰ بی بی کے زیرِ سماعت مقدمات سمیت ان سے متعلق قانونی معاملات پر بھی عمران خان سے مشاورت کی۔

ملاقات کے بعد بیرسٹر سلمان صفدر اور سردار لطیف کھوسہ میڈیا سے گفتگو کیے بغیر اڈیالہ جیل سے روانہ ہو گئے۔

یہ ملاقات اسلام آباد ہائی کورٹ کی جانب سے ایک روز قبل حکام کو عمران خان اور ان کی قانونی ٹیم کے درمیان ملاقاتیں یقینی بنانے کی ہدایت کے بعد ہوئی ہے۔

اسلام آباد ہائیکورٹ میں منگل کے روز 190 ملین پاؤنڈ کیس میں عمران خان اور بشریٰ بی بی کی سزاؤں کے خلاف دائر اپیلوں پر سماعت کے دوران وکیل سلمان صفدر نے عدالت میں عمران خان اور بشریٰ بی بی کی طبی حالت کے حوالے سے تشویش کا اظہار کیا۔

بیرسٹر سلمان صفدر نے عدالت کو بتایا کہ عمران خان کی آنکھوں کی صورت حال کچھ بہتر ہوئی ہے لیکن ان کا بلڈ پریشر کنٹرول میں نہیں ہے اور برین ہیمرج کا خطرہ بتایا جارہا ہے۔

ان کا کہنا تھا کہ بشریٰ بی بی کے لیے میڈیکل بورڈ تشکیل دینے کی استدعا کرتے ہوئے مؤقف اپنایا کہ ان کی آنکھ میں انجری کی وجہ سے حالت انتہائی خراب ہے اور 6 ماہ قبل ہونے والی سرجری کے بعد 15 نومبر کو دوبارہ آپریشن متوقع ہے۔

دوسری جانب ایڈووکیٹ جنرل اسلام آباد نے عدالت کے سامنے ان الزامات کی تردید کرتے ہوئے کہا کہ حکومت بشریٰ بی بی کو جیل میں تمام ممکن طبی سہولیات فراہم کی جا رہی ہیں۔

اسلام آباد ہائیکورٹ نے فریقین کے دلائل سننے کے بعد لطیف کھوسہ کی بانی پی ٹی آئی اور بشریٰ بی بی سے کم از کم ایک گھنٹے کی جیل ملاقات کرانے کا حکم دیا۔

عدالت نے ایڈووکیٹ جنرل اسلام آباد سے استفسار کیا کہ کیا لطیف کھوسہ کی بانی پی ٹی آئی اور بشریٰ بی بی سے ایک دو روز میں ملاقات کروائی جا سکتی ہے؟ چیف جسٹس نے ریمارکس دیے کہ وہ چاہتے ہیں کہ اگر راستے میں کوئی رکاوٹ ہے تو اسے دور کیا جائے۔

بدھ کے روز اڈیالہ جیل میں وکلا سے ملاقات سے چند گھنٹے قبل عمران خان کو آنکھوں کے طبی معائنے اور مزید علاج کے لیے دوبارہ پاکستان انسٹی ٹیوٹ آف میڈیکل سائنسز (پمز) اسپتال لے جایا گیا تھا۔

پمز انتظامیہ کے مطابق اسپیشلسٹ ڈاکٹرز نے عمران خان کے طبی معائنے کے بعد آنکھ میں ساتواں ’اینٹی وی ای جی ایف انجیکشن‘ لگایا جب کہ ڈاکٹرز کی ایک ٹیم نے ان کے دل کا بھی معائنہ کیا۔

واضح رہے کہ ’اینٹی ویسکولر انڈوتھلیل گروتھ فیکٹر (وی ای جی ایف) انجیکشن‘ آنکھ کے پردے (ریٹینا) کی مختلف بیماریوں کے علاج اور وہاں موجود خون کی شریانوں سے خون یا پانی کے غیر معمولی اخراج کو روکنے کے لیے لگایا کیا جاتا ہے۔

پمز اسپتال کی جانب سے جاری اعلامیے کے مطابق عمران خان 40 سے 50 منٹ تک اسپتال میں رہے بعد ازاں انہیں واپس اڈیالہ جیل راولپنڈی منتقل کر دیا گیا۔

واضح رہے کہ عمران خان 5 اگست 2023 سے جیل میں قید ہیں، جبکہ بشریٰ بی بی کو 17 جنوری 2025 کو ایک الگ مقدمے میں گرفتار کیا گیا تھا، جس میں بعد ازاں دونوں میاں بیوی کو سزا سنائی گئی۔