ایرانی وزیرِ خارجہ عباس عراقچی کی پاکستان آمد کا امکان
ایران کے وزیر خارجہ ڈاکٹر عباس عراقچی کی اقتصادی تعاون تنظیم (ای سی او) کے وزرائے خارجہ کونسل کے اعلیٰ سطحی اجلاس میں شرکت کے لیے آئندہ 72 گھنٹوں کے دوران اسلام آباد آمد متوقع ہے۔
سفارتی ذرائع کے مطابق 16 نومبر کو ہونے والے اس اہم علاقائی اجلاس میں ایران اور وسط ایشیائی ریاستوں سمیت تنظیم کے دیگر رکن ممالک کے وزرائے خارجہ شریک ہوں گے۔
تاہم ذرائع کا کہنا ہے کہ اس اجلاس میں شرکت کے لیے افغان طالبان حکومت کو دعوت نہیں دی گئی ہے۔
اجلاس کے انتظامات کو حتمی شکل دی جا چکی ہے اور غیر ملکی وفود کی آمد اتوار سے شروع ہونے کی توقع ہے، جبکہ اجلاس کی باقاعدہ نشستوں کا آغاز پیر کی صبح ہوگا۔
پاکستان کے نائب وزیراعظم اور وزیر خارجہ سینیٹر اسحاق ڈار اجلاس کا افتتاحی خطاب کریں گے، جبکہ اقتصادی تعاون تنظیم کے سیکرٹری جنرل ڈاکٹر اسد مجید خان کا خطاب بھی شیڈول کا حصہ ہے۔
اس علاقائی فورم کے دوران رکن ممالک کے وزرائے خارجہ تجارت کے فروغ، علاقائی روابط میں اضافے، اقتصادی تعاون کے نئے مواقع اور خطے کو درپیش مشترکہ چیلنجز پر تفصیلی تبادلہ خیال کریں گے۔
دورہ پاکستان کے دوران ایرانی وزیر خارجہ عباس عراقچی کی پاکستانی قیادت سے الگ سے دوطرفہ ملاقاتیں بھی متوقع ہیں۔
اطلاعات کے مطابق وہ وزیراعظم شہباز شریف اور نائب وزیراعظم اسحاق ڈار سے ملاقات کریں گے، جن میں باہمی تجارت، توانائی کے شعبے میں تعاون، علاقائی سلامتی اور مشرق وسطیٰ کی بدلتی ہوئی صورتحال پر بات چیت کی جائے گی۔
اس کے علاوہ وزیراعظم شہباز شریف اجلاس میں شریک مہمان وزرائے خارجہ سے ملاقات کریں گے اور ان کے اعزاز میں ظہرانہ بھی دیں گے، جس سے سفارتی روابط کو مزید فروغ ملنے کی توقع ہے۔
پاکستان کی جانب سے اس اجلاس کی میزبانی ایک ایسے وقت میں کی جا رہی ہے جب خطے کے ممالک اقتصادی شراکت داری کو مضبوط بنانے اور سرحد پار تجارت کو وسعت دینے کے لیے کوشاں ہیں۔
اقتصادی تعاون تنظیم جنوبی ایشیا، وسط ایشیا اور مشرق وسطیٰ کے ممالک کو ایک پلیٹ فارم پر یکجا کرتی ہے تاکہ مشترکہ معاشی اور ترقیاتی اہداف کے حصول کے لیے پالیسیوں کو ہم آہنگ بنایا جا سکے۔
اس اجلاس کے اختتام پر رکن ممالک کے درمیان علاقائی تعاون اور معاشی روابط کے حوالے سے آئندہ کے لائحہ عمل کا اعلان متوقع ہے۔