بصرہ کے پاور پلانٹ میں گیس پائپ لائن پھٹنے سے آگ بھڑک اٹھی، چار افراد ہلاک
جنوبی عراق کے شہر بصرہ میں واقع حریثہ پاور پلانٹ کو گیس فراہم کرنے والی پائپ لائن میں دھماکے اور شدید آتشزدگی کے نتیجے میں کم از کم چار افراد ہلاک اور 35 زخمی ہو گئے ہیں، جب کہ سکیورٹی حکام نے ہلاکتوں میں مزید اضافے کا خدشہ ظاہر کیا ہے۔
برطانوی خبر رساں ادارے ’رائٹرز‘ کے مطابق آگ ہفتے کی صبح مقامی وقت کے مطابق تقریباً چھ بجے بصرہ کے شمال میں واقع حریثہ پاور اسٹیشن میں بھڑک اٹھی، جو تیزی سے قریبی رہائشی گھروں تک پھیل گئی۔
عراقی سکیورٹی میڈیا سیل کا کہنا ہے کہ زیادہ تر جانی نقصان اور زخمی ہونے والے افراد کا تعلق انہی متاثرہ گھروں سے ہے، جو جھلسنے اور دھویں کے باعث متاثر ہوئے۔
عراق کی سرکاری خبر رساں ایجنسی (آئی این اے) کے مطابق شہری دفاع اور فائر بریگیڈ کے عملے نے موقع پر پہنچ کر آگ پر قابو پا لیا ہے، تاہم حادثے کے بعد پاور اسٹیشن کی سرگرمیاں مکمل طور پر معطل کر دی گئی ہیں۔
عراقی وزارتِ بجلی نے تصدیق کی ہے کہ حادثہ پاور پلانٹ کو ایندھن فراہم کرنے والی گیس پائپ لائن میں پیش آیا۔ جائے وقوعہ سے سامنے آنے والی تصاویر میں گیس پائپ لائن کے شدید تباہ شدہ حصے، جھلسی ہوئی زمین اور چاروں طرف بکھرا ہوا ملبہ دیکھا جا سکتا ہے۔
دوسری جانب عراقی وزیراعظم علی الزیدی کے دفتر سے جاری بیان میں کہا گیا ہے کہ وزیراعظم نے پاور اسٹیشن میں ہونے والے دھماکے کی وجوہات جاننے اور ذمہ داران کے تعین کے لیے فوری تحقیقات کا حکم دے دیا ہے۔
سکیورٹی حکام کے مطابق حریثہ پاور اسٹیشن کی مجموعی پیداواری صلاحیت 800 میگاواٹ ہے، تاہم آتشزدگی سے قبل یہ تقریباً 400 میگاواٹ بجلی پیدا کر رہا تھا۔ حکام کا کہنا ہے کہ دھماکے کی اصل وجہ اور مجموعی نقصانات کا حتمی تخمینہ تاحال سامنے نہیں آ سکا۔
واضح رہے کہ عراق کا بجلی کا بنیادی ڈھانچہ کئی دہائیوں سے کم سرمایہ کاری اور ناقص دیکھ بھال جیسے مسائل کا شکار ہے، جب کہ گرمیوں میں طلب بڑھنے اور تکنیکی خرابیوں یا آتشزدگی کے واقعات کے باعث ملک کو ماضی میں بھی بجلی کے شدید بحران کا سامنا رہا ہے۔