وزیر خزانہ محمد اورنگزیب نے واضح کیا ہے کہ کم از کم تنخواہ 37 ہزار ہی رہے گی، کاربن لیوی کا تعلق موسمیاتی تبدیلی سے ہے، فوسل ایندھن استعمال کم کرنا چاہتے ہیں۔
آج نیوز کے پروگرام ”اسپاٹ لائٹ“ میں اینکر منیزے جہانگیر نے وزیر خزانہ محمد اورنگزیب سے سوال کیا کہ کیا 37 ہزار میں ایک شخص کا اس مہنگائی میں گزارا ہوسکتا ہے۔
آج نیوز کے اس سوال کے جواب پر وزیرخزانہ محمد اورنگزیب نے اینکر کو یہ کہہ کر گھما دیا کہ یہ اعداد و شمار بین الاقوامی طور پر تصدیق شدہ ہیں۔
جب سوال دہرایا گیا کہ کیا کم سے کم تنخواہ مناسب ہے تو پھر واضح جواب دینے کے بجائے وزیر خزانہ نے کہا کہ کم سے کم تنخواہ ابھی وہی رہے گی جو تھی۔
اینکر کی جانب سے سوال کیا گیا کہ پیٹرولیم مصنوعات کی قیمتیں بڑھانے کے لیے کاربن لیوی لگائی؟ جس پر وزیرخزانہ محمد اورنگزیب نے وضاحت دیتے ہوئے کہا کہ کاربن لیوی کا تعلق موسمیاتی تبدیلی سے ہے، ہم فوسل ایندھن استعمال کم کرنا چاہتے ہیں۔
محمد اورنگزیب نے مزید کہا کہ ماحولیاتی آلودگی ٹھیک کرنا ہے تو فوسل فیولز کی حوصلہ شکنی ضروری ہے، آئی ایم ایف سے طے اصلاحات میں بھی یہ شامل ہے،آبی ذخائر کے لیے فنڈز مختص کیے جائیں گے۔