چینی کی قیمتوں میں توازن برقرار رکھنے اور عوامی ریلیف کو مدنظر رکھتے ہوئے حکومت نے 5 لاکھ ٹن چینی درآمد کرنے کا فیصلہ کیا ہے۔ اس سلسلے میں وزارت غذائی تحفظ کی جانب سے باضابطہ اعلامیہ جاری کر دیا گیا ہے۔
اعلامیہ کے مطابق چینی کی درآمد کا فیصلہ ڈی ریگولیشن پالیسی کے تحت کیا گیا ہے، جس کے تحت زرعی اجناس کی درآمد، برآمد اور ان کی قیمتوں کا تعین مارکیٹ فورسز کے مطابق ہوتا ہے۔
وزارت غذائی تحفظ نے واضح کیا ہے کہ گزشتہ سیزن میں چینی کے وافر ذخائر کے باعث اسے برآمد کیا گیا تھا، اور موجودہ درآمدی فیصلہ مارکیٹ میں قیمتوں کے استحکام اور دستیابی کو یقینی بنانے کے لیے کیا گیا ہے۔
اعلامیہ میں اس تاثر کو بھی غلط قرار دیا گیا ہے کہ ملک میں چینی کی وافر مقدار موجود نہیں، وزارت کے مطابق درآمد محض قیمتوں کو اعتدال میں رکھنے اور عوامی مفاد کے تحفظ کے لیے کی جا رہی ہے۔