وزیراعظم محمد شہباز شریف نے سعودی ولی عہد شہزادہ محمد بن سلمان اور ایرانی صدر مسعود پیزیشکیان سے ٹیلی فون پر رابطہ کیا، جس میں مشرق وسطیٰ کی صورتحال اور جنگ بندی پر بھی تبادلہ خیال کیا گیا۔
وزیراعظم شہبازشریف کا سعودی ولی عہد محمد بن سلمان سے ٹیلی فونک رابطہ
وزیراعظم شہباز شریف نے سعودی ولی عہد شہزادہ محمد بن سلمان سے ٹیلی فونک رابطہ کیا اور شاہ سلمان بن عبدالعزیز کے لیے نیک خواہشات کا اظہار کیا۔
وزیراعظم نے رواں برس حج کی کامیاب تکمیل پر سعودی ولی عہد کو مبارکباد دی جبکہ شہبازشریف نے پاکستانی حجاج کی مہمان نوازی پر سعودی عرب کا شکریہ ادا کیا۔
وزیراعظ شہباز شریف نے ہندوستان تنازع میں سعودی عرب کی پاکستان کی حمایت پر شکریہ ادا کرتے ہوئے کہا کہ پاکستان تمام تصفیہ طلب مسائل پر بھارت سے بات چیت کے لیے تیار ہے۔
ملاقات کے دوران دونوں رہنماؤں نے مشرق وسطیٰ کی صورتحال پر بھی تبادلہ خیال کیا، وزیراعظم نے کہا کہ پاکستان علاقائی کشیدگی میں فوری کمی کی مکمل حمایت کرتا ہے، پاکستان تنازع کے پرامن حل کے لیے مذاکرات اور سفارت کاری کا حامی ہے۔
وزیراعظم شہباز شریف نے فریقین سے تحمل کا مظاہرہ کرنے پر زور دیا جبکہ وزیراعظم نے سعودی عرب کے لیے پاکستان کی غیرمتزلزل حمایت کا اعادہ کیا۔
وزیراعظم نے سعودی ولی عہد کو خطے میں امن کی بحالی کی کوششوں پر خراج تحسین پیش کیا۔
سعودی ولی عہد شہزادہ محمد بن سلمان نے ٹیلی فون کال پر وزیراعظم شہباز شریف کا شکریہ ادا کیا۔
سعودی ولی عہد نے سعودی عرب کے ساتھ پاکستان کی یکجہتی اور حمایت کو سراہا جبکہ انہوں نے حالیہ تنازع کے پرامن حل کے لیے پاکستان کے تعمیری کردار کی بھی تعریف کی۔
وزیراعظم کا ایرانی صدر سے رابطہ، مذاکرات اور سفارت کاری سے امن کی بحالی پر زور
قبل ازیں وزیراعظم شہباز شریف نے اسلامی جمہوریہ ایران کے صدر ڈاکٹر مسعود پیزشکیان سے ٹیلی فونک رابطہ کیا، جس میں مشرق وسطیٰ کی صورت حال اور جنگ بندی پر تبادلہ خیال کیا گیا۔
اپنی گفتگو میں وزیراعظم نے کہا کہ پاکستان مشرق وسطیٰ میں تیزی سے ابھرتی ہوئی صورتحال پر مستقل طور پر نظر رکھے ہوئے ہے۔
شہباز شریف نے مذاکرات اور سفارت کاری کے ذریعے امن کی بحالی کی اہمیت پر زور دیا اور اقوام متحدہ کی سلامتی کونسل اور او آئی سی سمیت تمام سفارتی فورمز پر ایران کے لیے پاکستان کی حمایت کا اعادہ کیا۔
وزیراعظم شہبازشریف نے تمام فریقوں سے بین الاقوامی قانون اور اقوام متحدہ کے چارٹر کے اصولوں کی پاسداری پر زور دیا۔
ایرانی صدر پیزیشکیان نے حالیہ کشیدگی کے دوران پاکستان کی مستقل اور اصولی حمایت پر وزیراعظم کا شکریہ ادا کیا اور تنازع کے پرامن حل کو فروغ دینے میں پاکستان کے تعمیری کردار کا بھی اعتراف کیا۔
دونوں رہنماؤں نے مشکل ترین وقت میں امت کے درمیان اتحاد کی اہمیت پر اور آپس میں رابطے میں رہنے پر اتفاق کیا۔