فرانس کی بلڈ (خون) سپلائی ایجنسی نے اعلان کیا ہے کہ کیریبین جزیرے گواڈیلوپ سے تعلق رکھنے والی ایک خاتون میں خون کی ایک نئی اور نایاب ترین قسم دریافت ہوئی ہے، جسے ”گواڈا نیگیٹو“ (Gwada Negative) کا نام دیا گیا ہے۔ یہ دنیا میں اس خون کی واحد معلوم مثال ہے۔
فرانسیسی ادارے ”ای ایف ایس“ (EFS) نے جمعے کے روز ایک بیان میں کہا کہ ’ای ایف ایس نے دنیا کا 48واں خون گروپ سسٹم دریافت کیا ہے!‘
یہ اعلان 15 سال بعد کیا گیا، جب محققین کو پہلی مرتبہ 2011 میں ایک مریضہ کے خون میں ایک ”غیر معمولی اینٹی باڈی“ ملی تھی، جو سرجری سے قبل معمول کے ٹیسٹ کروا رہی تھیں۔
2019 میں ڈی این اے ٹیکنالوجی سے راز فاش
ای ایف ایس کے طبی ماہر تھیری پیراڈ کے مطابق، اس وقت وسائل کی کمی کے باعث مزید تحقیق ممکن نہ ہو سکی، تاہم 2019 میں جدید ڈی این اے ٹیکنالوجی کی مدد سے اس خون کی نوعیت کو مکمل طور پر سمجھا جا سکا، جس میں ایک خاص جینیاتی تبدیلی سامنے آئی۔
پیراڈ کے مطابق، ’یہ خاتون بلاشبہ دنیا میں اس خون کی واحد معلوم حاملہ ہیں۔ وہ خود ہی اپنے خون کے لیے واحد مطابقت رکھنے والی شخصیت ہیں۔‘
نئی خون کی قسم کا نام ”گواڈا نیگیٹو“
اس خون کی نئی قسم کو ”گواڈا نیگیٹو“ کا نام دیا گیا ہے، جو نہ صرف مریضہ کے جزیرے گواڈیلوپ سے تعلق کی نشاندہی کرتا ہے بلکہ ماہرین کے مطابق یہ نام تمام زبانوں میں موزوں اور پرکشش محسوس ہوتا ہے۔
یہ خون کی وہ قسم ہے جسے مریضہ کے والدین سے وراثت میں ملا، جن دونوں میں یہ جینیاتی تبدیلی موجود تھی۔
عالمی سطح پر تسلیم شدہ دریافت
فرانسیسی ادارے کے مطابق، یہ دریافت جون 2025 میں اٹلی کے شہر میلان میں ہونے والی انٹرنیشنل سوسائٹی آف بلڈ ٹرانسفیوژن (ISBT) کی جانب سے باضابطہ طور پر تسلیم کی گئی۔ اس سے قبل دنیا میں صرف 47 خون کے گروپ سسٹمز کو تسلیم کیا جاتا تھا۔
طب کے لیے اہم پیش رفت
ای ایف ایس نے کہا کہ ’نئے خون کے گروپس کی دریافت کا مطلب ہے کہ نایاب خون رکھنے والے مریضوں کو بہتر علاج فراہم کیا جا سکتا ہے۔‘
ماہرین اب اس منفرد گروپ کے حامل دیگر افراد کی تلاش میں ہیں تاکہ خون کی فراہمی اور ٹرانسفیوژن کے نظام کو مزید بہتر بنایا جا سکے۔
یہ دریافت نہ صرف میڈیکل سائنس کی تاریخ میں ایک اہم پیش رفت ہے بلکہ نایاب خون رکھنے والے افراد کے علاج میں بھی نئی راہیں کھول سکتی ہے۔