وزیراعلیٰ سندھ مراد علی شاہ کی زیر صدارت سندھ کابینہ کے اہم اجلاس میں پنشن اصلاحات سمیت کئی اہم فیصلوں کی منظوری دے دی۔
وزیراعلیٰ سندھ مراد علی شاہ کی زیر صدارت صوبائی کابینہ کا اہم اجلاس منعقد ہوا،جس میں عوامی مفاد سے جڑے 48 نکاتی ایجنڈے پر غور کیا گیا۔ اجلاس میں صوبائی وزراء، مشیران، معاونین خصوصی اور چیف سیکریٹری شریک ہوئے۔
ترجمان وزیراعلیٰ کے مطابق سندھ کابینہ کے اجلاس میں متعدد اہم فیصلے کیے گئے۔
پنشن اصلاحات اور کم ازکم اجرت
سندھ کابینہ نے پنشن اصلاحات کی منظوری دے دی، جس کا باقاعدہ نوٹیفکیشن محکمہ خزانہ جاری کرے گا۔ اس کے علاوہ کابینہ نے لیبر ڈپارٹمنٹ کو ہدایت کی کم از کم اجرت کا نوٹیفکیشن جاری کیا جائے۔
وزیراعلیٰ سندھ مراد علی شاہ نے کہا کہ اجرت کا نوٹیفکیشن جاری کرنے سے قبل تمام قانونی تقاضے پورے کیے جائیں۔
زرعی انکم ٹیکس رولز
سندھ کابینہ نے زرعی انکم ٹیکس رولز کی منظوری دے دی، نئے قواعد کے تحت زمیندار ایس آر بی کے ساتھ رجسٹریشن کا پابند ہوگا۔
کابینہ نے چیئرمین ہیومن رائٹس کمیشن اقبال ڈیتھو کے خلاف الزامات کی جانچ کے لیے سب کمیٹی قائم کر دی، سب کمیٹی میں وزیر قانون، وزیر ایکسائیز اور معاونِ خصوصی برائے انسانی حقوق شامل ہیں۔
سکھر اور حیدرآباد میں انڈسٹریل انکلیو بنانے کی منظوری
اجلاس میں سندھ کابینہ نے سکھر اور حیدرآباد میں انڈسٹریل انکلیو بنانے کی منظوری دے دی، حیدرآباد میں 951 ایکڑز دیھ گنجو ٹکر اور سکھر میں 400 ایکڑز روہڑی میں انڈسٹریل انکلیو قائم کیا جائے گا۔
ترجمان وزیراعلیٰ سندھ نے کہا کہ نئے انڈسٹریل انکلیو پبلک پرائیوٹ پارنٹرشپ کے تحت قائم ہوں گے۔
گرلز اینڈ وومین ووکیشنل ٹریننگ سینٹر بٹ خیلہ، ملاکنڈ میں قائم کرنے کی منظوری
سندھ کابینہ نے گرلز اینڈ وومین ووکیشنل ٹریننگ سینٹر بٹ خیلہ، ملاکنڈ میں قائم کرنے کی منظوری دے دی۔
سندھ کابینہ نے ووکیشنل ٹریننگ سینٹر قائم کرنے کیلئے ایک ارب روپے کی منظوری دے دی، ترجمان وزیراعلیٰ سندھ نے کہا کہ یہ ووکیشنل سینٹر زیبسٹ قائم کرے گی۔
تھرکول سے چھور تک 105 کلومیٹر ریلوے لائن بچھانے کیلئے فنڈز کی منظوری
سندھ حکومت نے تھر کول سے چھور تک 105 کلومیٹر ریلوے لائن بچھانے کے لئے فنڈز کی منظوری دی، وفاقی حکومت نے 7 ارب روپے مختص کیے تو سندھ حکومت بھی 7 ارب روپے دے گی۔
ترجمان وزیراعلیٰ سندھ نے کہا کہ ریلوے لائن بچانے کا منصوبہ 42 ارب روپے مالیت کا ہے۔
حب ڈیم کی مرمت کیلئے واٹر بورڈ کی جانب سے شیئر دینے کی منظوری
حب ڈیم کی مرمت کے لیے سندھ حکومت نے واٹر بورڈ کی جانب سے شیئر دینے کی منظوری دے دی۔
ترجمان وزیراعلیٰ نے کہا کہ سندھ حکومت واٹر بورڈ کی طرف سے ایک ارب روپے فراہم کرے گی۔
ڈی ایچ اے کو پانی پہنچانے کیلئے منصوبوں کی منظوری
کابینہ کو بریفنگ دی گئی کہ ڈی ایچ اے کو صرف 4 تا 5 ایم جی ڈی پانی ملتا ہے جبکہ 15 ایم جی ڈی پانی کی ضرورت ہے، 36 کلومیٹر پائپ لائن بچھانے سے ڈی ایچ اے کے 10 ایم جی ڈی پانی ڈملوٹی سے مہیا ہو سکے گا۔
ڈی ایچ اے کو پانی پہنچانے کے لیے پمپنگ اسٹیشن، فلٹریشن پلانٹ اور حوض بنانے کی کابینہ نے منظوری دے دی۔
سندھ کابینہ نے واٹر بورڈ کو ڈملوٹی پروجیکٹ کے لیے 10.56 ارب روپے بلاسود قرض دینے کی منظوری بھی دے دی۔
سندھ کابینہ اجلاس میں سیلاب متاثرہ کسانوں کیلئے امدادی فنڈ میں اضافے کا فیصلہ
سندھ کابینہ کے اجلاس میں سیلاب متاثرہ کسانوں کے لیے امدادی فنڈ میں اضافے کا فیصلہ کرلیا گیا۔
کابینہ نے فلڈ ایمرجنسی رسپانس فنڈ 21.56 ارب سے بڑھا کر 27.68 ارب روپے کی منظوری دے دی، اب تک امداد سے محروم 1.5 لاکھ سے زائد کسانوں کو فوری ریلیف دیا جائے گا۔
حکومت اور ورلڈ بینک کی مشاورت کے بعد 98 ملین ڈالر کسانوں کے لیے مختص کیے ہیں، یہ فنڈنگ 25 ایکڑ تک زرعی زمین رکھنے والے کسانوں کو رلیف کے مد میں فراہم ہوگی۔
وزیراعلیٰ سندھ نے کہا کہ بینظیر ہاری کارڈ کے ذریعے جدید سہولیات تک رسائی دی جائے گی، کارڈ کی رجسٹریشن جاری ہے،2 لاکھ 37 ہزار سے زائد کسان رجسٹر کیے گئے ہیں، زرعی مشینری کی سبسڈی، ہنگامی امداد،فصل انشورنس اور قرض کی سہولت فراہم کی جائے گی