پنجاب بلڈنگ کنٹرول اتھارٹی (پی بی سی اے) نے لاہور میں 84 خستہ حال عمارتوں کی نشان دہی کرلی، داتا گنج بخش زون میں 42 ، سمن آباد میں 13 اور راوی زون میں بھی 13 عمارتوں کو خطرناک قرار دیا گیا ہے۔
تفصیلات کے مطابق مون سون سیزن میں انسانی جانوں کے تحفظ کے پیش نظر پنجاب بلڈنگ کنٹرول اتھارٹی نے لاہور شہر میں مخدوش عمارتوں کا سروے مکمل کر لیا، اندرون لاہور سمیت 9 ٹاؤنز میں 84 خستہ حال عمارتوں کی نشانندہی کی گئی ہے۔
ڈپٹی ڈائریکٹر بلڈنگ کنٹرول محمد وقاص کے مطابق داتا گنج بخش زون میں 42، سمن آباد میں 13، شالیمار زون میں 3، راوی زون میں 13، واہگہ زون 10 اور عزیز بھٹی زون میں 3 عمارتیں خطرناک قرار دی گئی ہیں۔
محمد وقاص کا کہنا ہے کہ والڈ سٹی میں گزشتہ سال 600 خستہ حال عمارتوں کی نشاندہی ہوئی، جن میں سے 400 عمارتیں مکینوں کے تعاون سے مرمت کروا لی گئیں جبکہ 130 عمارتیں والڈ سٹی نے اپنے وسائل سے مرمت کروائیں۔
ڈپٹی ڈائریکٹر پنجاب بلڈنگ کنٹرول اتھارٹی کے مطابق والڈ سٹی میں 12 سے زائد عمارتیں حالیہ سروے میں بھی انتہائی مخدوش قرار دی گئی ہیں جنہیں خالی کروا لیا گیا ہے۔