کراچی کے علاقے ڈیفنس میں اپنے فلیٹ سے مردہ حالت میں ملنے والی اداکارہ حمیرا اصغر کی لاش بھائی اور بہنوئی نے وصول کرلی، بھائی نوید اصغر نے حمیرا کی تدفین لاہور میں کرانے کا اعلان کردیا اور والد کی جانب سے حمیرا کی لاش وصول کرنے سے انکار کی تردید کرتے ہوئے کہا کہ تھوڑی بہت ناراضگی ہر گھر میں ہوتی ہے۔
ہم 3 دن سے چھیپا صاحب اور پولیس سے رابطے میں تھے، نوید اصغر
متوفی حمیرا اصغر کے بھائی نوید اصغر نے رمضان چھیپا کے ہمراہ کراچی میں گفتگو کرتے ہوئے کہا کہ میں نوید اصغر ہوں، حمیرا میری چھوٹی بہن تھیں، میڈیا میں ایک تصور دیا گیا کہ والدین لاش وصول نہیں کررہے، باڈی اگر پولیس کی کسٹڈی میں ہو تو قانونی تقاضے مکمل کرنے پڑتے ہیں، ہم 3 دن سے چھیپا صاحب اور پولیس سے رابطے میں تھے، پولیس سے رابطے کے بعد کراچی آئے، حمیرا اصغر اپنی مرضی کے مالک تھی۔
نوید اصغر میڈیا میں غلط تاثر دیا گیا کہ والدین کا قطع تعلق تھا، حمیرا کے موبائل بند ہونے کے بعد کوئی رابطہ نہیں ہوا، آخری بار والدہ کا ایک سال قبل رابطہ ہوا تھا، پولیس کی تفتیشی اور پوسٹ مارٹم کی رپورٹ کا انتظار ہے، پھر قانونی کارروائی کا فیصلہ کریں گے۔
حمیرا اصغر کے بھائی نے کہا کہ سوشل میڈیا پر غلط پروپیگنڈا کیا گیا، تھوڑی بہت ناراضگی رہتی تھی، کسی نے یہ نہیں پوچھا کہ دروازہ اندر سے کھلا یا بند تھا، فلیٹ میں کمیرے نہیں تھے، میڈیا وہاں نہیں گیا نہ کسی نے سوال کیا۔
انہوں نے مزید کہا کہ ایک ماہ قبل میری پھوپھو کا روڈ ایکسیڈنٹ میں انتقال ہوا، والدین اس وجہ سے بھی کافی پریشان تھے، اچانک موت ہونا پھر میڈیا کی کالز آنا کافی مشکل مرحلہ تھا، ہم نے اب چھیپا سے رابطہ کرکے باڈی وصول کی۔
فلیٹ کی چابی اور سی سی ٹی وی سے متعلق امور پر غور نہ کرنے پر حمیرا کے بھائی نے میڈیا پر تنقید کی اور ساتھ ہی سوال کردیا کہ فلیٹ کے مالک کا انٹرویو لینے پر کسی نے توجہ کیوں نہیں دی۔
بعدازاں حمیرا اصغر کی لاش قانونی کارروائی کے بعد ورثاء کے حوالے کردی گئی، بھائی اور بہنوئی حمیرا کی میت لے کر چھیپا ایمبولینس کے ذریعے لاہورروانہ ہوگئے۔
قانونی کارروائی کے بعد لاش ان کے حوالے کردی جائے گی، ایس ایس پی ساؤتھ
اس سے قبل کراچی کے علاقے ڈیفنس کے فلیٹ سے ماڈل اداکارہ حمیرا اصغر کی لاش ملنے کے حوالے سے ایس ایس پی ساؤتھ محظور علی نے اپنے دفتر میں میڈیا سے گفتگو کرتے ہوئے کہا کہ حمیرا کے بھائی اور بہنوئی لاہور سے کراچی آئے ہیں، قانونی کارروائی کے بعد لاش ان کے حوالے کردی جائے گی، دونوں میت وصول کرکے لاہور لے جائیں گے، حمیرا اصغر کی تدفین بھی لاہور میں ہوگی۔
ایس ایس پی نے کہا کہ میں نے پوچھا آپ حمیرا سے رابطے میں تھے، جس پر اہل خانہ نے ایس ایس پی کو جواب دیا کہ وہ ہم سے رابطے میں رہتی تھیں۔
محظور علی نے بتایا کہ حمیرا کے ڈرگ استعمال کرنے کے کوئی شواہد نہیں ملے، سی ڈی آر سے پتہ چلا کے اکتوبر کے آخر میں رابطہ میں تھیں، فریج سے ملنے ایشیا کی ایکسپائری بھی اکتوبر کی ملی ہے، یوٹیلیٹی بل، کے الیکٹرک بل بھی ماہ اکتوبر کے ملے ہیں، عدم ادائیگی پر کے الیکٹرک نے بجلی منقطع کردی تھی۔
انہوں نے مزید کہا کہ مالک مکان کو آخری کرایہ مئی کا ادا کیا گیا ہے، ان تاریخوں کے بعد سوشل میڈیا پر ایکٹویٹی نظر نہیں آئی۔
ایس ایس پی ساؤتھ نے کہا کہ گھر اندر سے لاک تھا جسے توڑ کر اندر داخل ہوئے، اہل خانہ نے میڈیکل رپورٹ کے بعد ہی اگلا قدم اٹھانے کا کہا ہے، حمیرا سے برآمد اشیاء پر پاس ورڈ لگے ہیں، حمیرا کے زیر استعمال اشیاء ڈیجیٹل فرانزک کے لیے روانہ کردی ہیں، پاس ورڈ کھلنے کے بعد حمیرا کا تمام ڈیٹا شیئرکرسکتے ہیں۔
محظور علی نے مزید کہا کہ حمیرا کی کسی عزیز نے ان کی گمشدگی سے متعلق رابطہ نہیں کیا، پڑوسی بھی وہاں موجود نہیں تھے اس لیے بو محسوس نہ ہوئی، جس عمارت میں حمیرا اصغر کا فلیٹ تھا وہاں ہر فلور پر دو فلیٹس بنے ہیں، پڑوس میں مقیم افراد بھی فروری 2025 میں بیرون ملک سے واپس آئے، ڈاکٹرز کو ملنے والے شواہد کے مطابق باڈی 8 ماہ پرانی ہے،
اداکارہ حمیرا اصغر کے اہل خانہ لاش وصول کرنے کراچی پہنچ گئے
اس سے قبل کراچی کے علاقے ڈیفنس میں اپنے فلیٹ سے مردہ حالت میں ملنے والی اداکارہ حمیرا اصغر کے اہل خانہ لاش وصول کرنے کراچی پہنچ گئے۔
اداکارہ حمیرا اصغر کے بھائی اور بہنوئی نے پولیس افسران سے ملاقات کی، بھائی اور بہنوئی نے ایس ایس پی ساؤتھ سمیت دیگر افسران سے ملاقات کی۔
اداکارہ حمیر اصغر کی لاش وصول کرنے کے لیے تھانے سے باضابطہ لیٹر کچھ دیر بعد جاری کر دیا جائے گا۔
اداکارہ حمیرا اصغر کے لواحقین لاش وصول کرنے پر رضا مند ہوگئے
قبل ازیں کراچی کے علاقے ڈیفنس میں اپنے فلیٹ سے مردہ حالت میں ملنے والی اداکارہ حمیرا اصغر کے لواحقین لاش وصول کرنے پر رضا مند ہوگئے۔
کراچی کے پوش علاقے ڈیفنس سے ملنے والی معروف ماڈل و اداکارہ حمیرا اصغر علی کی لاش کے معاملے پر اہم پیش رفت سامنے آئی ہے، حمیرا اصغر کے اہلِ خانہ لاش وصول کرنے پر رضامند ہو گئے۔
پولیس کے مطابق اداکارہ کے بہنوئی نے دوبارہ رابطہ کیا ہے اور حمیرا کے بھائی کو ساتھ لانے کا کہا ہے، گزشتہ روز اہلِ خانہ کو ہدایت کی گئی تھی کہ لاش وصولی کے لیے حقیقی رشتے داروں کے ہمراہ آئیں۔
اہلِ خانہ کے مطابق وہ چند گھنٹوں میں کراچی پہنچ رہے ہیں اور لاش وصول کریں گے۔
صوبائی وزیر ثقافت و سیاحت کا اداکارہ کی تدفین کروانے کا فیصلہ
صوبائی وزیر ثقافت و سیاحت سید ذوالفقار علی شاہ نے محکمے کی جانب سے اداکارہ حمیرا اصغر کی تدفین کرانے کا فیصلہ کرلیا۔
رپورٹ کے مطابق صوبائی وزیر سید ذوالفقار علی شاہ کا ایڈیشنل آئی جی کراچی سے رابطہ کیا اور ان سے اداکارہ حمیرا اصغر کی تدفین کے معاملے پر گفتگو کی۔
صوبائی وزیر نے ڈائریکٹر جنرل کلچر کو معاملے پر فوکل پرسن مقرر کرتے ہوئے کہا کہ مرحوم اداکارہ حمیرا اصغر کے ورثاء اگر لاش وصول یا تدفین نہیں کرتے تو محکمہ ثقافت حمیرا اصغر کا وارث ہوگا۔
صوبائی وزیر سید ذوالفقار علی شاہ سیکریٹری ثقافت سندھ نے ڈی آئی جی ایسٹ کو لاش حوالگی کیلئے خط بھی ارسال کردیا۔ خط میں کہا گیا کہ مرحوم حمیرا اصغر لاوارث نہیں سندھ حکومت محکمہ ثقافت وارث ہے۔ ان کا کہنا تھا کہ حمیرا اصغر کا واقعہ افسوسناک اور دل دہلانے والا واقعہ ہے۔ تدفین قبرستان سمیت تمام مراحل محکمہ ثقافت کے ذمہ ہوگا۔
سید ذوالفقار علی شاہ نے مزید کہا کہ ہماری پہلی کوشش ہے کہ والدین راضی ہوں اور لاش وصول کریں۔ انہوں نے یقین دہانی کروائی کہ پولیس کے تعاون سے اس معاملے پر محکمہ ثقافت اپنا بھرپور کردار ادا کرے گا۔
حمیرا اصغر 8 جولائی کو کراچی کے علاقے ڈی ایچ اے کے فلیٹ سے مردہ حالت میں ملی تھیں، ابتدائی طور پر پولیس نے بتایا تھا کہ ان کی لاش 20 دن تک پرانی لگی ہے، تاہم بعد ازاں حیران کن انکشافات سامنے آئے۔
پولیس نے 9 جولائی کو بتایا کہ ممکنہ طور پر حمیرا اصغر کی لاش 6 ماہ سے زائد عرصے سے پرانی تھی، لاش سے خون کے نمونے تک حاصل نہیں کیے جا سکے تھے جب کہ گھٹنوں سے بھی لاش گلنا شروع ہوگئی تھی۔
پولیس نے 8 جولائی کو بتایا تھا کہ حمیرا اصغر کے والد نے بیٹی کی لاش وصول کرنے سے انکار کرتے ہوئے بتایا تھا کہ وہ بیٹی سے کچھ عرصہ قبل تعلقات ختم کرچکے تھے۔