پاکستان تحریک انصاف (پی ٹی آئی) نے 5 منحرف اراکین قومی اسمبلی کو کو پارٹی سے نکال دیا اور باقاعدہ نوٹیفکیشن بھی جاری کردیا۔
تفصیلات کے مطابق 26 ویں آئینی ترمیم میں پی ٹی آئی رہنماؤں کے ووٹ ڈالنے کے معاملے پر پاکستان تحریک انصاف نے آئینی ترمیم میں حکومتی اتحاد کو ووٹ دینے والے 5 اراکین قومی اسمبلی کو پارٹی سے نکال دیا۔
چیئرمین پی ٹی آئی بیرسٹرگوہر کے دستخطوں سے منحرف اراکین اسمبلی کی پارٹی سے بے دخلی کا نوٹیفکیشن جاری کردیا گیا، جس کے مطابق پارٹی سے نکالے گئے قومی اسمبلی ممبران میں ظہور قریشی ، اورنگزیب خان کھچی، مبارک زیب خان، الیاس چوہدری اور عثمان علی شامل ہیں۔
اراکین قومی اسمبلی کو پارٹی سے نکالنے کے حوالے سے کہا گیا کہ مذکورہ اراکین نے 26ویں آئینی ترمیم کی حمایت کے لیے پارٹی ہدایات کی خلاف ورزی کی جبکہ پارٹی اجلاس میں ترمیم کی مخالفت کا متفقہ فیصلہ کیا گیا تھا۔
نوٹیفکیشن میں کہا گیا کہ منحرف اراکین نے 21 اکتوبر 2024 کو ترمیم کے حق میں ووٹ دیا اور پارٹی وفاداری اور حلف کی سنگین خلاف ورزی کی گئی ہے۔
بیرسٹر گوہر کی جانب سے نوٹیفکیشن میں کہا گیا کہ پارٹی ہدایت پر عمل نہ کرنے پر شوکاز نوٹس جاری کیا گیا تھا اور شوکاز نوٹس پر جواب نہ دینے پر پارٹی نے کارروائی کی۔
نوٹیفکیشن میں ان اراکین کو دوسری جماعت میں شمولیت پر نااہلی کے بھی مستحق قرار دیا گیا ہے اور مطالبہ کیا گیا ہے کہ ان اراکین قومی اسمبلی کو عہدے سے بھی نااہل قرار دیا جائے۔