لیونل میسی کو حریف کھلاڑی کو تھپڑ مارنے پر جرمانہ

امریکا اور کینیڈا کی مشہور لیگ ’میجر لیگ سوکر‘ (ایم ایل ایس) نے حریف کھلاڑی کو تھپڑ مارنے پر انٹر میامی کے اسٹار فٹ بالر لیونل میسی پر جرمانہ عائد کر دیا ہے۔ 19 اگست کو انٹر میامی اور فلاڈیلفیا یونین کے درمیان کھیلے گئے 2-2 سے برابر رہنے والے میچ میں کھلاڑیوں کے درمیان کئی مرتبہ تلخی دیکھنے میں آئی جب کہ اختتامی لمحات میں ہاتھا پائی پر دو کھلاڑیوں کو ریڈ کارڈ بھی جاری ہوئے۔

میجر لیگ سوکر کی جانب سے جاری بیان کے مطابق لیگ کی ڈسپلنری کمیٹی نے انٹر میامی کے فارورڈ لیونل میسی پر حریف کھلاڑی پر ہاتھ اٹھانے پر جرمانہ عائد کیا ہے، تاہم جرمانے کی رقم ظاہر نہیں کی گئی ہے۔

یہ کارروائی انٹر میامی اور فلاڈیلفیا یونین کے درمیان 19 اگست کو کھیلے گئے سنسنی خیز میچ کے بعد سامنے آئی ہے جس میں میدان کے اندر دونوں ٹیموں کے کھلاڑیوں کے درمیان متعدد مواقع پر تلخی دیکھنے میں آئی تھی۔

میچ کے دوران لیونل میسی اور فلاڈیلفیا یونین کے مڈفیلڈر کوئن سلیوان کے درمیان بھی تنازع پیدا ہوا۔ میسی کا مؤقف تھا کہ گیند پاس کرنے کے بعد سلیوان نے انہیں کہنی ماری تھی۔

ریفری نے فوری مداخلت کرتے ہوئے دونوں کھلاڑیوں کو الگ کیا اور معاملہ مزید بڑھنے سے روک دیا، تاہم دونوں کے درمیان تلخی برقرار رہی۔

بعد ازاں میسی نے کوئن سلیوان کی گردن پر ہلکا سا تھپڑ مارا، جس کے بعد دونوں کھلاڑی ایک بار پھر آمنے سامنے آگئے جس کے بعد ریفری نے دوبارہ مداخلت کرکے صورت حال کو قابو میں کیا۔

میجر سوکر لیگ کی پالیسی کے مطابق میچ کے دوران مخالف کھلاڑی کے چہرے، سر یا گردن پر ہاتھ لگانا ڈسپلنری خلاف ورزی کے زمرے میں آتا ہے۔ اسی پالیسی کی خلاف ورزی پر ہی میسی کو جرمانے کا سامنا کرنا پڑا۔

میسی کے علاوہ انٹر میامی کے کھلاڑی ایان فرے پر بھی کوئن سلیوان کے ساتھ الجھنے کے معاملے پر جرمانہ عائد کیا گیا ہے۔

میچ کے اختتامی لمحات میں کشیدگی مزید بڑھ گئی اور اضافی وقت کے دوران کھلاڑیوں کے درمیان ہاتھا پائی کے بعد انٹر میامی کے یانک برائٹ اور فلاڈیلفیا یونین کے کیون سلیوان کو ریڈ کارڈ دکھایا گیا۔ تاہم کیون سلیوان کا ریڈ کارڈ بعد میں نظرثانی کے بعد منسوخ کر دیا گیا۔

دونوں ٹیموں کی جانب سے 2-2 گولز اسکور کیے جانے کے بعد میچ برابر رہا۔ لیونل میسی نے ایک گول اسکور کیا جو لیگ میں انٹر میامی کے لیے ان کا دوسرا گول ہے۔

میجر لیگ سوکر امریکا اور کینیڈا کی اعلیٰ ترین پروفیشنل فٹ بال لیگ ہے۔ حالیہ برسوں میں عالمی شہرت یافتہ کھلاڑیوں کی آمد کے باعث لیگ کی بین الاقوامی مقبولیت میں اضافہ ہوا ہے۔

لیونل میسی 2023 میں انٹر میامی کا حصہ بنے تھے، ان کے ساتھ ٹیم میں فرانسیسی کلب بارسلونا کے پرانے ساتھی سرجیو بسکیٹس اور لوئس سواریز بھی شامل ہیں۔ اس کے علاوہ جورڈی البا بھی انٹر میامی کلب کا حصہ ہیں۔