کراچی کے علاقے ڈیفنس کے فلیٹ سے ماڈل اور اداکارہ حمیرا اصغر کی لاش ملنے کے معاملے میں ایک اور پیشرفت سامنے آئی ہے، حمیرا کیس میں ایک کے بعد ایک انکشاف ہونے لگا۔
ذرائع کے مطابق تفتیشی حکام نے اداکارہ حمیرا اصغر کے بینک اکاؤنٹ کی تفصیلات بھی حاصل کرلیں، حمیرا کے زیر استعمال میں نجی بینک (ایچ بی ایل) میں کرنٹ اکاؤنٹ تھا، بینک میں 3 لاکھ 98 ہزار سے زائد رقم موجود ہے۔
تفتیشی ذرائع کا کہنا ہے کہ حمیرا اے ٹی ایم سے کبھی 25 اور کبھی 50 ہزار نکلواتی تھی، ماڈل کی ٹرانزیکشز سے لگتا ہے وہ شدید مالی پریشانی کا شکار نہیں تھی۔
تفتیشی ذرائع نے بتایا کہ اداکارہ کے دیگر بینک اکاؤنٹ کی چھان بین کے لیے خط لکھا ہے، حمیرا کے گھر سے کسی قسم جیولری کا نہ ملنا ایک نقطہ ہے، نقد رقم اور کسی قسم کے زیور کا نہ ملنے کو بطور ایک اہم نقط تفتیش کا حصہ بنایا گیا ہے، حمیرا اصغر کے زیر استعمال ایک ایپل فون بھی غائب ہے۔
خیال رہے کہ حمیرا اصغر کی لاش 8 جولائی کو کراچی کے علاقے ڈیفنس (ڈی ایچ اے) کے ایک کرائے کے فلیٹ سے ملی تھی، جہاں وہ 2018 سے مقیم تھیں۔
پولیس اور ابتدائی پوسٹ مارٹم رپورٹ کے مطابق اداکارہ کی لاش تقریباً 10 ماہ پرانی تھی اور امکان ظاہر کیا گیا ہے کہ ان کی موت اکتوبر کے پہلے ہفتے میں ہوئی تھی۔