اسپیشل سینٹرل عدالت لاہور نے سابق وزیراعلیٰ پنجاب چوہدری پرویز الہٰی سمیت دیگر کے خلاف منی لانڈرنگ کیس کی سماعت کا تحریری حکم جاری کردیا۔
اسپیشل سینٹرل عدالت کے جج عارف خان نیازی نے 2 صفحات پر مشتمل جاری کیا، جس کے مطابق ایف آئی اے نے پرویز الہی کے تفتیشی افسر کو معطل کردیا۔
تحریری حکم کے مطابق، ایف آئی اے کے اسسٹنٹ ڈائریکٹر نے عدالت کو آگاہ کیا کہ پرویز الہٰی کے کیس کے تفتیشی افسر کو کسی دوسری انکوائری میں معطل کیا گیا، کمیٹی کی منظوری کے بعد ہی چالان عدالت میں جمع کروایا جائے گا۔
عدالت نے عبوری حکم میں آئندہ سماعت تک پرویز الہٰی سمیت دیگر کا چالان لازمی طور پر عدالت میں پیش کرنے کی ہدایت کی، دورانِ سماعت پرویز الہٰی کی ایک روزہ حاضری معافی کی درخواست پر شکایت کنندہ کے وکیل نے اعتراض اٹھایا۔
حکم نامے کے مطابق وکیل نے مؤقف اختیار کیا کہ یہ حاضری معافی محض تاخیر کی حکمتِ عملی ہے کیونکہ گزشتہ سماعت پر بھی یہی بیڈ ریسٹ کا عذر پیش کیا گیا، عدالت نے ریمارکس دیے کہ گزشتہ حاضری معافی میں کہا گیا تھا کہ ڈاکٹر نے 10 روز کے بیڈ ریسٹ کا مشورہ دیا ہے اور آج بھی وہی مدت درج کی گئی ہے، عدالت کو یہ بھی باور کرایا کہ کیس میں ابھی تک ٹرائل کا آغاز نہیں ہوا، جس سے انصاف کی فراہمی متاثر ہو رہی ہے۔
عدالت نے پرویز الٰہی کی ایک روزہ حاضری معافی کی درخواست منظور کرتے ہوئے سماعت 18 اگست تک ملتوی کر دی۔