رمضان المبارک برکتوں اور رحمتوں کا مہینہ ہے، جہاں دن بھر کی عبادت کے بعد افطاری کے لمحات سب کے لیے خاص ہوتے ہیں۔ اس موقع پر ہر گھر میں نت نئے پکوان تیار کیے جاتے ہیں تاکہ روزہ داروں کو توانائی اور خوشی فراہم کی جا سکے۔ آج ہم آپ کے لیے ایک ایسی خاص افطاری کی ترکیب لے کر آئے ہیں جو نہ صرف بچوں اور بڑوں کو پسند آئے گی بلکہ اسے بنانا بھی بہت آسان ہے۔ چکن بریڈ پاکٹ ایک مزیدار اور کرسپی سنیک ہے جو افطاری، چائے کے وقت اور بچوں کے لنچ باکس کے لیے بہترین انتخاب ہو سکتا ہے۔ تو آئیے بغیر وقت ضائع کیے اس کی آسان ترکیب جانتے ہیں۔
چکن فلنگ بنانے کے لیے ایک پین میں دو کھانے کے چمچ تیل گرم کریں اور اس میں ایک چائے کا چمچ کٹا ہوا لہسن ڈال کر ہلکی آنچ پر 20 سے 30 سیکنڈ تک بھونیں۔ اب ایک کپ بونلیس چکن شامل کریں اور اسے ایک منٹ تک تلیں یہاں تک کہ اس کا رنگ تبدیل ہو جائے۔ اس کے بعد اس میں آدھا چائے کا چمچ نمک، آدھا چائے کا چمچ پسی ہوئی سرخ مرچ، آدھا چائے کا چمچ سرخ مرچ پاؤڈر اور آدھا چائے کا چمچ زیرہ پاؤڈر ڈال کر اچھی طرح مکس کریں۔ اب اس میں تھوڑا سا پانی ڈال کر ڈھکن ڈھانپ دیں اور ہلکی آنچ پر 8 سے 10 منٹ تک پکائیں تاکہ چکن گل جائے اور پانی بخارات بن کر اڑ جائے۔ پھر ایک ٹماٹر کے بیج نکال کر اسے باریک کاٹ کر چکن میں شامل کریں اور ایک کھانے کا چمچ سویا ساس ڈال کر مکس کریں۔ آخر میں ایک ٹکڑا پنیر ڈالیں اور چند سیکنڈ کے لیے ڈھک کر رکھیں تاکہ پنیر پگھل جائے۔ اس طرح ہماری چکن فلنگ تیار ہو جائے گی، جسے ہم کچھ دیر کے لیے ٹھنڈا ہونے کے لیے رکھ دیں گے۔
رمضان اسپیشل: تکہ ملائی بوٹی ایک اور مزیدار اور کریمی ریسپی
اب بریڈ پاکٹ بنانے کے لیے سفید بریڈ سلائسز کے کنارے کاٹ کر دو سلائسز کو آپس میں جوڑ کر بیلنے کی مدد سے رول کریں تاکہ وہ جڑ جائیں۔ پھر اسٹیل کے گلاس یا کٹر کی مدد سے انہیں گول شکل میں کاٹ لیں۔ ایک پیالے میں دو انڈے پھینٹ لیں اور ایک پلیٹ میں بریڈ کرمب رکھیں۔ اب ہر گول سلائس کو پہلے انڈے میں ڈپ کریں اور پھر بریڈ کرمب میں اچھی طرح لپیٹ لیں۔ ایک کڑاہی میں درمیانی آنچ پر تیل گرم کریں اور ان بریڈ پاکٹس کو سنہری اور کرسپی ہونے تک فرائی کریں۔ جب وہ اچھی طرح فرائی ہو جائیں تو انہیں تیل سے نکال کر جاذب کاغذ پر رکھ دیں تاکہ اضافی تیل جذب ہو جائے۔
چٹنی بنانے کے لیے ایک باؤل میں چار کھانے کے چمچ مایونیز، ایک چوتھائی چائے کا چمچ نمک، ایک چوتھائی چائے کا چمچ کالی مرچ پاؤڈر، دو کھانے کے چمچ کیچپ، ایک کھانے کا چمچ چلی سوس اور آدھا لیموں کا رس ڈال کر اچھی طرح مکس کریں۔ اب بریڈ پاکٹ کو درمیان سے ہلکا سا کاٹ کر جیب بنائیں اور اس میں پہلے چٹنی لگائیں، پھر لیٹش کا پتہ رکھیں اور اس کے بعد چکن فلنگ بھر دیں۔ آخر میں دوبارہ چٹنی ڈالیں اور گرم گرم سرو کریں۔
یہ مزیدار چکن بریڈ پاکٹ رمضان میں افطاری کے لیے ایک بہترین ڈش ہے۔ اسے بنانے میں زیادہ وقت بھی نہیں لگتا اور ہر کوئی اسے شوق سے کھاتا ہے۔ تو اس رمضان، یہ خاص ترکیب ضرور آزمائیں اور اپنی افطاری کو مزید لذیذ بنائیں