وزیراعظم شہباز شریف سے برطانوی ہائی کمشنر جین میریٹ نے ملاقات کی، جس میں دو طرفہ تعلقات ، جنوبی ایشیا اور مشرق وسطیٰ کی صورتحال پر تبادلہ خیال کیا گیا، وزیراعظم نے کہا کہ وہ رواں سال برطانیہ کی قیادت سے ملاقات کے منتظر ہیں۔
تفصیلات کے مطابق وزیراعظم شہبازشریف سے پاکستان میں برطانوی ہائی کمشنر جین میریٹ نے وزیراعظم ہاؤس میں ملاقات کی، جس میں دونوں رہنماؤں نے پاکستان اور برطانیہ کے درمیان دوطرفہ تعلقات، تجارتی مذاکرات اور عالمی سطح پرتعاون پرگفتگو کی۔
وزیراعظم نے کنگ چارلس سوئم اور وزیراعظم کیئر اسٹارمر کے لیے نیک خواہشات کا اظہار کیا اور برطانوی حکومت کی جانب سے پی آئی اے کی پروازوں کی بحالی کے حالیہ فیصلے کا خیرمقدم کیا۔
ملاقات کے دوران وزیراعظم شہباز شریف نے پاکستان اور برطانیہ کے درمیان حالیہ تعاون کی مثبت پیشرفت پر اطمینان کا اظہار کیا اور اقوام متحدہ کی سلامتی کونسل میں برطانیہ کے ساتھ تعاون کو اہم قرار دیا۔
ملاقات کے دوران جنوبی ایشیا اور مشرق وسطیٰ کی موجودہ علاقائی صورتحال پر بھی تبادلہ خیال کیا گیا، جہاں وزیراعظم نے پاک بھارت کشیدگی میں کمی کے لیے برطانیہ کے کردار کو سراہتے ہوئے باہمی مذاکرات کی آمادگی کا اعادہ کیا۔
شہباز شریف نے کہا کہ وہ اس سال کے اواخر میں برطانیہ کی قیادت کے ساتھ اپنی ملاقات کے منتظر ہیں، اس مثبت پیشرفت سے برطانوی پاکستانی کمیونٹی کو درپیش مشکلات کو دور کرنے کے ساتھ ساتھ لوگوں کے درمیان تبادلے کو بڑھانے میں بھی مدد ملے گی جبکہ انہوں نے اس سلسلے میں ہائی کمشنر کے مثبت کردار کو خاص طور پر سراہا۔
برطانوی ہائی کمشنر جین میریٹ نے وزیراعظم کے وژن اور حکومت کی معاشی کارکردگی کو سراہا اور پاکستان کے ساتھ تعلقات کو مزید مستحکم بنانے کے لیے اپنی کوششوں کا اعادہ کیا۔
برطانوی ہائی کمشنر نے اپنے حالیہ دورہ لندن کے دوران پاکستان اور برطانیہ کے تعلقات بڑھانے پروسیع مشاورت کی تفصیلات بھی فراہم کیں جبکہ دونوں جانب سے علاقائی امن و استحکام کے حوالے سے تعاون جاری رکھنے پراتفاق کیا گیا۔