خلیج فارس میں ایک بار پھر امریکہ اور ایران کے درمیان فوجی کشیدگی دیکھنے میں آئی جب ایرانی بحریہ کے ایک ہیلی کاپٹر نے ایک امریکی میزائل بردار جہاز کو وارننگ جاری کی اور علاقے سے نکلنے کا مطالبہ کیا۔ واقعہ بدھ کی صبح مقامی وقت کے مطابق 10 بج کر 50 منٹ پر پیش آیا۔
ایرانی میڈیا رپورٹس کے مطابق، امریکی جنگی جہاز ’یو ایس ایس فٹز جیرالڈ‘ کی موجودگی کی اطلاع ملتے ہی ایرانی بحریہ نے فوری طور پر ایک ’سی کنگ‘ ہیلی کاپٹر علاقے میں روانہ کیا۔ ایرانی ہیلی کاپٹر نے امریکی جہاز کو وائرلیس وارننگ دی کہ وہ ایران کی سمندری حدود کے قریب نہ آئے اور فوری طور پر اپنا رخ موڑ لے۔
اس وارننگ کے جواب میں امریکی بحری جہاز سے ایرانی ہیلی کاپٹر کے لیے ایک ’خطرے کی وارننگ‘ جاری کی گئی۔ اس موقع پر کشیدگی میں اس وقت اضافہ ہوا جب ایرانی ایئر ڈیفنس فورس نے مداخلت کرتے ہوئے امریکی جہاز کو خبردار کیا کہ ایرانی ہیلی کاپٹر کی مکمل حفاظت کی جائے گی اور کسی بھی جارحیت کا منہ توڑ جواب دیا جائے گا۔
امریکا، ایران جوہری مذاکرات اگلے ہفتے اوسلو میں ہونے کا امکان
ذرائع کے مطابق، ایرانی وارننگ اور دفاعی حکمت عملی کے جواب میں، امریکی جنگی جہاز نے جنوب کی جانب رخ موڑتے ہوئے علاقے سے فاصلہ اختیار کر لیا، جسے ایرانی میڈیا نے ایک ’سفارتی اور دفاعی کامیابی‘ قرار دیا ہے۔
امریکی موقف
امریکی حکام نے اس واقعے کی تصدیق کرتے ہوئے کہا ہے کہ امریکی جہاز بین الاقوامی پانیوں میں معمول کی گشت پر تھا اور ایرانی ہیلی کاپٹر کی غیر ضروری مداخلت قرار دیا۔ پینٹاگون کے ایک ترجمان نے کہا، ’ہم خطے میں کشیدگی نہیں چاہتے، لیکن اپنے عملے اور جہاز کی حفاظت کے لیے ہر ضروری قدم اٹھائیں گے۔‘
ضرورت پڑی تو واشنگٹن دوبارہ حملہ کرے گا، ڈونلڈ ٹرمپ کی ایران کو پھر دھمکی
علاقائی تناظر
یہ واقعہ ایسے وقت میں پیش آیا ہے جب خلیج فارس میں ایران اور امریکہ کے درمیان بحری تناؤ میں وقتاً فوقتاً اضافہ دیکھنے کو ملتا رہا ہے۔ حالیہ مہینوں میں بھی کئی مواقع پر ایرانی اور امریکی فورسز کے درمیان جھڑپیں اور وارننگز رپورٹ ہو چکی ہیں۔
تاہم اس صورتِ حال کو دیکھتے ہوئے تجزیہ کاروں کا کہنا ہے کہ اس قسم کی جھڑپیں کسی بھی وقت کسی بڑے تصادم کا پیش خیمہ بن سکتی ہیں، لہٰذا دونوں ممالک کو تحمل اور سفارتی راستے اپنانے کی ضرورت ہے۔