اسلام آباد کی ڈسٹرکٹ اینڈ سیشن کورٹ میں ٹک ٹاکر ثناء یوسف قتل کیس میں پولیس نے چالان پراسیکوشن برانچ میں جمع کرا دیا ہے۔
ڈسٹرکٹ اینڈ سیشن کورٹ میں ثناء یوسف قتل کیس میں اہم پیشرفت سامنے آئی ہے، پولیس نے کیس کا عبوری چالان پراسیکیوشن برانچ میں جمع کرا دیا۔ ذرائع کے مطابق چالان میں ملزم عمر حیات کو ہی ثناء یوسف کا قاتل قرار دیا گیا ہے۔
پراسیکیوشن کی دو رکنی ٹیم چالان کی سکروٹنی کرے گی، جس میں راجہ نوید کیانی اور محمد عدنان شامل ہیں۔
اسکروٹنی کا عمل مکمل ہونے کے بعد چالان کو عدالت میں جمع کرایا جائے گا جس کے بعد متعلقہ جج کی عدالت میں مقدمے کا باقاعدہ ٹرائل شروع ہوگا۔
ٹک ٹاکر ثناء یوسف قتل کیس کے ملزم عمر حیات نے اعتراف جرم کرلیا
ذرائع کے مطابق پولیس چالان میں مقتولہ ثناء یوسف کی والدہ، پھوپھو سمیت متعدد گواہان کے بیانات شامل کیے گئے ہیں۔
اس کے علاوہ چالان میں ملزم عمر حیات کے مجسٹریٹ کے روبرو دفعہ 164 کے تحت دیے گئے اعترافی بیان کا بھی حوالہ موجود ہے۔
واضح رہے کہ 17 سالہ ٹک ٹاکر ثنا یوسف کو عمر حیات نامی لڑکے نے دوستی نہ کرنے پر گھر میں گھس کر فائرنگ کر کے قتل کردیا تھا۔