کارکنوں کو چن چن کر سزائیں دی جارہی ہیں، کوئی تو ہے جو خوفزدہ ہے، علیمہ خان

پاکستان تحریک انصاف (پی ٹی آئی) کے بانی چیئرمین عمران خان کی ہمشیرہ علیمہ خان نے کہا ہے کہ عوام کو آزادی کے لیے اب خود نکلنا پڑے گا، ہمیں انتظار نہیں کرنا چاہیئے بانی باہر آئے گا تو تحریک چلے گی، 5 اگست جب آئے گا تو دیکھا جائے گا، سب نکلیں گے، پلان بنا ہوا ہے، کارکنوں کو چن چن کر سزائیں دی جا رہی ہیں، کوئی تو ہے جو خوفزدہ ہے۔

راولپنڈی اڈیالہ جیل کے باہر اپنی 2 بہنوں کے ہمراہ میڈیا سے گفتگو کرتے ہوئے علیمہ خان نے بتایا کہ اڈیالہ جیل میں آج توشہ خانہ ٹو کیس کی سماعت تھی، صبح 11 بجے سے ہم جیل کے باہر کھڑے رہے، پراسیکیوشن کے 8 سے 9 لوگ اندر جاتے ہیں، کیسے ہوسکتا ہے ایک وکیل اپنی ٹیم کے بغیر سماعت میں شامل ہو، 4 گھنٹے سے ہم جیل کے باہر ہیں۔

علیمہ خان نے کہا کہ یہ فیئر ٹرائل کیسے ہوگا جب وکلاء کو اندر نہیں جانے دیں گے، جج صاحب نے کہا فیملی اور وکلاء کو اندر آنے دیں، 26 ویں ترمیم کے اثرات اب آپ دیکھ سکتے ہیں، ججز کے احکامات کو نظر انداز کیا جارہا ہے، بانی پی ٹی آئی کی وجہ سے جج بھی بے بس ہیں، انصاف کا نظام اور ججز بے بس ہوچکے ہیں۔

انہوں نے مزید کہا کہ یہی وجہ ہے عمران خان نے کہا ہے کہ تحریک شروع کریں، ان کو یہ ڈر ہے کہیں تحریک نہ چلے، بانی نے کہا یے عوام اپنے حق کے لیے کھڑے ہوں، پی ٹی آئی کے کارکنوں کو چن چن کر سزائیں دی جارہی ہیں، کوئی تو ہے جو ڈرا ہوا ہے، میرے وکلاء نے مجھے کہا ضمانت لینی ہے آپ کو گرفتار کیا جائے گا۔

عمران خان کی بہن نے کہا کہ ہمیں خوفزدہ لوگوں سے کوئی ڈر نہیں، ان کو خوف ہے عمران خان کا ایک لفظ بھی باہر نہ آئے، بانی بار بار 9 مئی کے واقعات کی سی سی ٹی وی فوٹیجز کا مطالبہ کررہے، عوام کو آزادی کے لیے اب خود نکلنا پڑے گا، ہمیں انتظار نہیں کرنا چاہیئے بانی باہر آئے گا تو تحریک چلے گی۔

علیمہ خان کا مزید کہنا تھا کہ پارٹی نے لائحہ عمل دینا ہے، لوگوں نے خود نکلنا ہے، 5 اگست جب آئے گا تو دیکھا جائے گا، شکوک شبہات کی کوئی بات نہیں، میں نے ہمیشہ کہا ہے سب نکلیں گے، پلان بنا ہوا ہے۔