وزیراعظم شہباز شریف کا کہنا ہے کہ پاکستان نے جنگ میں بھارت کو تاریخی شکست دی، جنگ میں فتح کے بعد عالمی سطح پر پاکستان کا وقار بلند ہوا، فوج نے دلیری اور مہارت سے دشمن کا مقابلہ کیا، امریکی صدر جب جب پاک بھارت جنگ رکوانے سے متعلق بیان دیتے ہیں تو مودی کے زخم دوبارہ تازہ ہوجاتے ہیں، انہوں نے کئی بار کہا انہوں نے جنگ رکوائی، یہ پاکستان کی سفارتی کامیابی کی زندہ مثال ہے۔
تفصیلات کے مطابق لاہور میں پاک بزنس ایکسپریس ٹرین کی افتتاحی تقریب سے خطاب کرتے ہوئے وزیراعظم شہباز شریف نے کہا کہ ڈونلڈ ٹرمپ نے متعدد بار اس بات کا اعتراف کیا کہ ہم نے جنگ رکوائی، امریکی صدر جب کہتے ہیں کہ پاک بھارت جنگ ہم نے رکوائی تو مودی کے زخم دوبارہ تازہ ہو جاتے ہیں، شکست خوردہ بھارت کو اقوام عالم میں ذلت آمیز رسوائی کا سامنا ہے۔
وزیراعظم نے کہا کہ پاکستان اور چین ترقی کی نئی راہوں پر گامزن، پاک امریکہ تعلقات نئے دورمیں داخل ہونے جا رہے ہیں، ملکی معیشت درست سمت میں گامزن ہو چکی جبکہ ریلوے میں مثبت تبدیلی نظر آ رہی ہے، ریلوے کی شاندار بحالی پر وزیر ریلوے حنیف عباسی کی پذیرائی کریں گے۔ ملکی ترقی کیلئے ہمیں محنت اور دیانت کو اپنا شعار بنانا ہو گا۔
شہباز شریف نے مزید کہا کہ آج مدتوں بعد مجھے ریلوے اسٹیشن لاہور آ کر بہت مسرت ہوئی، یہاں خوشگوار تبدیلی دیکھنے کو ملی، پاکستان ریلوے میں مثبت تبدیلی نظر آ رہی ہے۔
انہوں نے کہا کہ پاک بزنس ٹرین میں صرف اشرافیہ کے لیے ہی نہیں بلکہ عام آدمی کے لیے یورپی ریلوے کی طرز پر شاندار سفری سہولیات فراہم کی گئی ہیں، ٹکٹ کا پرانا نظام ختم کر کے جدید ڈیجیٹائز سسٹم متعارف کرایا گیا جبکہ مسافر لاؤنج ،استقبالیہ ڈیسک اور ٹرین میں یورپ کی طرز پر مسافروں کے لیے شاندار انتظامات پر وزیر ریلوے کو مبارکباد پیش کرتا ہوں۔
ان کا کہنا تھا کہ دنیا میں ٹرانسپورٹ کی سہولیات کی فراہمی میں ریلوے کا کلیدی کردار ہے، ریلوے نظام کو ٹھیک کرنے کو سراہتے ہوئے وزیر اعظم محمد شہباز شریف نے کہا کہ حنیف عباسی نے ناممکن کو ممکن کر دکھایا اور ریلوے کو دوبارہ پاؤں پر کھڑ ا کر دیا، ریلوے کی بہتری کے حوالے سے آج میرا خواب شرمندہ تعبیر ہوتا ہوا نظر آ رہا ہے۔
وزیراعظم نے کہا کہ یہ ابھی پہلا قدم ہے ابھی منزلیں بہت ہیں ،ملک کے دیگر شہروں میں بھی اس طرح کی ٹرینیں چلائیں گے، اداروں کی بہتری اور ملکی ترقی کے لیے ہمیں دن رات کام کرنا ہے، محنت اور دیانت کو اپنا شعار بنا کر ملک کی تقدیر بدلی جا سکتی ہے، دنیا کو دکھا دیں گے، اگر نیت نیک اور اردہ مصمم ہو تو مشکل سے مشکل ہدف بھی حاصل کیا جا سکتا ہے۔
شہباز شریف نے مزید کہا کہ ریلوے کی بہتری کے لیے خدمات کا کریڈٹ خواجہ سعد رفیق کو بھی جانا چاہیے، پی ڈی ایم دور میں خواجہ سعد رفیق نے بھی ریلوے کو بہتر انداز میں چلانے کی کوشش کی، اراضی واگزار کرانے اور ریلوے اسٹیشنز کو بہتر کرنے کے حوالے سے انہوں نے مجھے متعدد بار بریفنگ دی۔
وزیراعظم شہباز شریف نے قوم کو فتح مبین کی مبارکباد دیتے ہوئے کہا کہ 9 مئی کے معرکہ حق میں پاک فوج نے دلیری اور مہارت کے ساتھ دشمن کا مقابلہ کیا، جنگ میں فتح کے بعد پاکستان کا عالمی سطح پر وقار بلند ہوا اور دنیا نے دیکھا کہ کس طرح ہماری فضائی، بری اور بحری افواج نے بہادری ، مہارت اور جدید ٹیکنالوجی کو بروئے کار لاتے ہوئے بہت ہی کم وقت میں اپنے سے بڑے دشمن کو ناکوں چنے چبوائے،
انہوں نے کہا کہ میں ایک ایک لمحے کا گواہ ہوں، پاکستان نے بھارت کو جنگ میں تاریخی شکست دی، یہ پاکستان کی سفارتی کامیابی کی زندہ مثال ہے، امریکی صدر ڈونلڈ ٹرمپ نے متعدد بار کہا کہ ہم نے جنگ رکوائی،امریکی صدر جب کہتے ہیں کہ پاک بھارت جنگ ہم نے رکوائی تو مودی کے زخم دوبارہ تازہ ہو جاتے ہیں۔ وزیر اعظم نے کہاکہ ہمارے ایٹمی اثاثے قومی سلامتی کے ضامن ہیں، دشمن ہماری طرف میلی آنکھ سے دیکھنے کی جرأت نہیں کر سکتا۔
ملکی معاشی حالات کے حوالے سے گفتگو کرتے ہوئے وزیراعظم نے کہا کہ عسکری فتح کے ساتھ ساتھ معاشی میدان میں بھی کامیابی ملی ہے، حکومتی اقدامات کی بدولت مہنگائی میں واضح کمی آئی ہے ،افراط زر کی شرح میں5 فیصد کمی آئی ہے، معاشی اعشاریے بہتری کی طرف گامزن ہیں اور یہ معاشی کامیابی ٹیم ورک کا نتیجہ ہے۔
شہباز شریف نے مزید کہا کہ آنے والے دنوں میں معاشی میدان میں مزید کامیابیاں حاصل ہوں گی۔ چین پاکستان شاندار تعلقات کے حوالے سے وزیر اعظم محمد شہباز شریف نے کہا کہ پاکستان اور چین ترقی کی نئی راہوں پر گامزن ہیں، چین کے ساتھ سی پیک فیز 2 کے لیے پوری طرح کوآرڈینیشن ہے، امریکا کے ساتھ از سر نو تعلقات استوار کئے جا رہے ہیں۔
قبل ازیں وزیر اعظم محمد شہباز شریف نے مسافر لاؤنج، استقبالیہ سمیت لاہور ریلوے اسٹیشن کے مختلف شعبہ جات کا دورہ کیا اور انتظامات کو سراہا۔
بعد ازاں انہوں نے پاک بزنس ایکسپریس ٹرین کا افتتاح کیا اور ٹرین کوچز کا معائنہ کیا۔اس موقع پر وفاقی وزیر نے وزیر اعظم کو بریفنگ دی اور بتایا کہ پاک بزنس ٹرین لاہور سے کراچی کے درمیان چلے گی اور لاہور سے ساڑھے 18 گھنٹے میں کراچی پہنچے گی۔
بجلی تقسیم کار کمپنیوں کا خسارہ 193 سے کم ہوکر 780 ارب پر آگیا
دوسری جانب وزیراعظم شہباز شریف نے کہا کہ کئی دہائیوں میں پہلی بار بجلی تقیسم کار کمپنیوں کے خسارے میں کمی آنا انتہائی خوش آئند ہے، خسارے میں کمی سے ان کمپنیوں کی نجکاری کا عمل آسان ہو جائے گا۔
تفصیلات کے مطابق وزیراعظم محمد شہباز شریف کی زیر صدارت کابینہ کمیٹی برائے توانائی کا اجلاس وزیراعظم ہاؤس اسلام آباد میں ہوا۔
وزیراعظم نے وفاقی وزیر برائے پاور ڈویژن سردار اویس احمد لغاری، وفاقی سیکریٹری پاور ڈویژن ڈاکٹر محمد فخر عالم اور ان کی ٹیم کی ستائش کرتے ہوئے پاور سیکٹر اصلاحات کے حوالے سے ان کی شاندار کارکردگی کو سراہا۔
شہباز شریف نے بہترین کارکردگی دکھانے والی اور خسارے میں کمی لانے والی بجلی کی تقیسم کار کمپنیوں کے چیف ایگزیکٹو افسران کو ستائشی خطوط بھیجنے کی ہدایت کی۔
اجلاس کو پاور ڈویژن کی جانب سے بجلی کی تقیسم کار کمپنیوں اور گردشی قرضوں پر بریفنگ دی گئی۔ اجلاس کو بتایا گیا کہ بجلی تقیسم کار کمپنیوں کا خسارہ 193 ارب روپے کم ہوا ہے، لاہور الیکٹرک سپلائی کمپنی اور ملتان الیکٹرک پاور کمپنی نے خسارے میں کمی کے حوالے سے سب سے اچھی کارکردگی دکھائی، بجلی تقیسم کار کمپنیوں کے خسارے میں 242 ارب روپے کی بہتری آئی ہے۔ اجلاس کو مزید بتایا گیا کہ گردشی قرضوں کا فلو 780 ارب روپے رہا ہے۔