پاکستان تحریک انصاف کے رہنما اور سابق وزیراعظم آزاد کشمیر سردار عبدالقیوم نیازی کو بھمبر کے علاقے سماہنی سے حراست میں لے لیا گیا، سابق وزیراعظم ریلی سے خطاب کے لیے سماہنی پہنچے تھے۔
ذرائع کے مطابق آزاد کشمیر کے سابق وزیراعظم سردار عبدالقیوم نیازی کو آزاد کشمیر پولیس نے گرفتار کرلیا، گرفتاری سے قبل سردار عبدالقیوم نیازی سماہنی سے بھمبر جلسے میں شرکت کے لیے جارہے تھے کہ جھنڈی جونترہ کے مقام پر پولیس نے انہیں گرفتار کرلیا۔
اس موقع پر پولیس اور پی ٹی آئی کے کارکنوں کے دریا ہاتھا پائی بھی ہوئی، سابق وزیراعظم سردار عبدالقیوم نیازی بانی چیئرمین پی ٹی آئی عمران خان کی رہائی کے سلسلے میں 5 اگست کو لاہور میں ہونے والے جلسہ میں شرکت کے حوالے سے عوامی رابطہ مہم پر تھے اور وہ احتجاجی ریلی سے خطاب کے لیے سماہنی پہنچے تھے۔
ذرائع کے مطابق سابق وزیراعظم آزاد کشمیر کو سمائنی سے حراست میں لینے کے بعد میرپور منتقل کردیا گیا۔
پی ٹی آئی آزاد کشمیر کے صدر کی گرفتاری کے بعد دیگر قائدین کی گرفتاری اور آزاد کشمیر سے پی ٹی آئی کے قافلوں کو لاہور جانے سے روکنے کے حوالے سے امکانات بڑھ گئے ہیں۔
پولیس کے مطابق سردار عبدالقیوم نیازی پر 11 سے زائد مقدمات درج تھے، 2 دن قبل 9 مئی کے مقدمات میں ان کے وارنٹ گرفتاری جاری ہوئے تھے۔
واضح رہے کہ سردار عبدالقیوم نیازی نے آزاد کشمیر کے 13ویں وزیراعظم کے طور پر 4 اگست 2021 سے 14 اپریل 2022 تک اپنی ذمہ داریاں نبھائیں۔