اسرائیل نے اتوار کی شام یمن سے فائر کیے گئے ایک ڈرون کو روکنے کا دعویٰ کیا ہے، جس کے نتیجے میں جنوبی اسرائیل میں سائرن بجنے لگے۔
عرب میڈیا کے مطابق اسرائیلی فوج نے اپنے ’ایکس‘ اکاؤنٹ پر ایک بیان میں کہا کہ بنی نتسریم میں سائرن بجنے کے بعد فضائیہ نے یمن سے آنیوالا ایک ڈرون مار گرایا۔
فوج کی جانب سے جاری بیان کے مطابق، ”یمن سے داغا گیا ایک میزائل جو اسرائیلی حدود میں داخل ہو چکا تھا، اسے فضا میں کامیابی سے روکا گیا۔“
یمنی فوج نے غیرملکی سرمایہ کاروں کو اسرائیل چھوڑنے کیلئے الٹی میٹم دے دیا
بیان میں مزید کہا گیا کہ میزائل کو روکنے کے دوران اس کے کچھ ٹکڑے مرکزی اسرائیل کے علاقے مودعین میں گرے، تاہم اس کی تفصیلات کا جائزہ لیا جا رہا ہے۔
اسرائیل کی ایمرجنسی سروس، ماگن ڈیوڈ آدوم، نے بتایا کہ فضائی حملے کے سائرن بجنے کے بعد پناہ گاہوں کی طرف دوڑتے ہوئے کئی افراد زخمی ہوئے یا شدید گھبراہٹ کا شکار ہو گئے۔
یمن پر تازہ امریکی حملے، شہداء کی تعداد 80 ہوگئی، صنعا میں شدید احتجاج
چند گھنٹوں بعد اسرائیلی فوج نے یہ بھی اعلان کیا کہ یمن سے آنے والے ایک ڈرون کو بھی اسرائیلی حدود میں داخل ہونے سے پہلے ہی مار گرایا گیا۔
یاد رہے کہ منگل کو بھی اسرائیل نے یمن سے داغے گئے ایک اور میزائل کو فضا میں تباہ کر دیا تھا۔
یمن کے بیشتر علاقے ایران کے حمایت یافتہ حوثی باغیوں کے کنٹرول میں ہیں، جو اسرائیل-حماس جنگ کے دوران فلسطینیوں سے اظہارِ یکجہتی کے طور پر اسرائیل اور بحیرہ احمر و خلیج عدن میں جہازوں پر حملے کر رہے ہیں۔
یمن اسرائیل کے نشانے پر؛ الحدیدہ بندرگاہ پر بمباری کے بعد مرکزی ہوائی اڈے پر بھی حملہ
حوثیوں نے نومبر میں اسرائیل اور ایران کے حمایت یافتہ حزب اللہ کے درمیان جنگ بندی کے بعد اپنے حملوں میں شدت پیدا کر دی ہے۔
اسرائیل نے بھی جوابی کارروائی کرتے ہوئے یمن میں مختلف مقامات کو نشانہ بنایا ہے، جن میں دسمبر کے آخر میں صنعاء کا بین الاقوامی ہوائی اڈہ بھی شامل ہے۔