افریقی ملک گھانا میں فوجی ہیلی کاپٹر گر کر تباہ ہوگیا جس کے نتیجے میں 2 وزرا سمیت 8 افراد ہلاک ہوگئے۔
عالمی میڈیا کے مطابق گھانا کے جنوبی علاقے میں فوجی ہیلی کاپٹر حادثے کا شکار ہوا ہے جس میں گھانا کے وزیر دفاع اور وزیر ماحولیات بھی ہلاک ہوئے ہیں۔ ہلاک ہونے والوں میں ائیرفورس کا 3 رکنی عملہ اور حکومتی اہلکار شامل ہیں۔
رپورٹ کے مطابق مطابق ہیلی کاپٹر نے دارالحکومت اکرا سے جنوبی شہر اوبواسی کے لیے پرواز بھری تھی جو ایک اہم کان کنی کا مرکز ہے، دورانِ پرواز ہیلی کاپٹر کا کنٹرول روم سے رابطہ منقطع ہوگیا جس پر فوری طور پر سرچ آپریشن شروع کیا گیا۔
یہ حادثہ ملک کے جنوبی اشانتی ریجن میں پیش آیا تھا، جہاں ہیلی کاپٹر کے ملبے سے اُٹھتا ہوا دھواں دور دیکھا گیا، تاحال حادثے کی وجہ کا تعین نہیں ہوسکا تاہم موسمی حالات بھی ایک وجہ سے ہوسکتے ہیں۔
گھانا کی فوج، سول ایوی ایشن اتھارٹی اور دیگر متعلقہ ادارے اس حادثے کی وجوہات جاننے کے لیے مشترکہ تحقیقات کر رہے ہیں۔
گھانا کے چیف آف اسٹاف جولیس ڈیبراہ نے تصدیق کی ہے کہ ہلاک ہونے والوں میں وزیرِ دفاع ایڈورڈ عمانے بواما اور وزیرِ ماحولیات ابراہیم مرتضیٰ محمد شامل ہیں، دونوں وزرا کے ساتھ ہلاک ہونے والوں میں دیگر 3 مسافر اور عملے کے 3 ارکان بھی شامل ہیں۔
صدر جان مہاما کے چیف آف اسٹاف جولیئس دیبرا نے کہا، ”صدر اور حکومت اپنے شہداء کے اہل خانہ سے دلی ہمدردی اور یکجہتی کا اظہار کرتے ہیں، جنہوں نے قوم کی خدمت میں اپنی جانیں قربان کیں۔“
حادثے میں نائب قومی سلامتی کوآرڈینیٹر اور سابق وزیر زراعت الہاجی محمد منیرو لمونا، اور مہاما کی نیشنل ڈیموکریٹک کانگریس کے نائب چیئرمین سیموئیل سارپونگ بھی شامل ہیں۔