معرکۂ حق میں پاکستان کے ہاتھوں عبرت ناک شکست کے بعد، مودی سرکار کا جنگی جنون ایک بار پھر بے قابو ہو گیا۔ نئی دہلی خطے کو دوبارہ جنگ میں جھونکنے کے لیے مہلک ہتھیاروں کی بھاری خریداری میں مصروف ہے۔
بھارت کی مودی سرکار نے خطے کے امن کو ایک بار پھر داؤ پر لگا دیا ہے۔ جنگی سازوسامان کی ایک بڑی خریداری کی منظوری دے کر نئی دہلی نے خطے میں اپنی جنگی تیاریوں کا خطرناک عندیہ دے دیا۔
بھارتی میڈیا کے مطابق، مودی حکومت نے 87 مسلح ہیوی ڈیوٹی ڈرونز، 110 سے زائد براہموس میزائلز، اور دیگر خطرناک ہتھیاروں کی خریداری کی منظوری دے دی ہے، جن کی مجموعی لاگت 67 ہزار کروڑ روپے بنتی ہے۔
بھارتی اخبار دی ٹائمز آف انڈیا کے مطابق، اس خطرناک عسکری منصوبے کے تحت:
٭ بھارتی فوج کے لیے تھرمل امیجنگ نائٹ سائٹس
٭ بھارتی بحریہ کے لیے براہموس فائر کنٹرول سسٹم، لانچر اور خودمختار سطحی جہاز
٭ بھارتی فضائیہ کے لیے ماؤنٹین ریڈار اور اسپائڈر ہتھیار نظام کی اپ گریڈیشن
٭ C-17 اور C-130J طیاروں کی دیکھ بھال کے فنڈز
٭ S-400 طویل رینج ایئر ڈیفنس سسٹم کی سالانہ مینٹیننس
اور ریموٹلی پیلٹڈ ایئرکرافٹ کی خریداری شامل ہے۔ دی ٹائمز آف انڈیا کے مطابق آپریشن سندور کے دوران ہوا سے زمین پر مار کرنے والے میزائلوں کی کمی محسوس کی گئی، انٹیلی جنس، نگرانی اور ہتھیار اٹھانے کی صلاحیت والے 87ڈرونز کی لاگت 20ہزار کروڑ روپے ہو گی۔
بھارتی میڈیا کے مطابق مہلک ہتھیاروں کا مجموعہ تشکیل دینا مودی سرکار کی آپریشنل تیاریوں میں ناکامی کا اعتراف ہے، S-400ائیر ڈیفنس سسٹم کی مینٹیننس جنگ میں پاکستان کے ہاتھوں بڑی تباہی کا منہ بولتا ثبوت ہے۔
جنگی ہتھیاروں کی بھر مار کر کے مودی پاکستان پر ایک بار پر جارحیت کی تیاری میں مشغول ہے، پاکستان نے معرکہ حق میں بھارت کا بڑا عسکری نقصان کرکے ثابت کیا کہ کسی بھی جارحیت کا منہ توڑ جواب دیا جائے گا۔