قومی اسمبلی کا اجلاس آج ہوگا، اجلاس کا 17نکاتی ایجنڈا جاری کردیا گیا ہے۔ ٹیکس ڈیجیٹلائزیشن کیلئے توجہ دلاونوٹس ایجنڈے میں شامل ہیں۔
اسپیکرقومی اسمبلی ایاز صادق کی زیر صدارت قومی اسمبلی کا اجلاس آج صبح ساڑھے گیارہ بجے ہوگا، جس کا 17 نکاتی ایجنڈا جاری کردیا گیا، ایجنڈے کے مطابق ٹیکس ڈیجیٹلائزیشن کے لئے میکنسی فرم کی خدمات حاصل کرنے پر توجہ دلاؤ نوٹس پیش کیا جائے گا۔
وزیر تجارت جام کمال مانع اغراق محصولات ترمیمی بل پیش کریںگے، اس کے علاوہ وزیر داخلہ محسن نقوی تحویل ملزمان ترمیمی بل 2024 ایوان میں پیش کریںگے، جبکہ وزیر داخلہ سوسائٹیز رجسٹریشن ترمیمی آرڈیننس 2024 آئین کے آرٹیکل 89 کی متقاضیات کے مطابق ایوان میں پیش کریںگے۔
اس کے علاوہ اجلاس میں پاکستان شہریت ترمیمی بل 2024 منظوری کے لئے پیش کیا جائےگا، مختلف قائمہ کمیٹیوں کی معیادی رپورٹس بھی قومی اسمبلی اجلاس میں پیش کی جائیں گی۔
وفاقی وزیر پارلیمانی امور صدر مملکت کے مشترکہ اجلاس سے خطاب کی نقول پیش کریںگےاور اظہار تشکر کی تحریک بھی پیش کریںگے۔
حلقہ این اے 86 میں نئے گیس کنکشنز کی عدم فراہمی سے متعلق توجہ دلاؤ نوٹس بھی پیش کیا جائیگا۔