امریکی صدر ڈونلڈ ٹرمپ روسی صدر ولادیمیر پیوٹن سے ملاقات کے لیے واشنگٹن سے الاسکا پہنچ گئے۔
امریکی صدر ڈونلڈ ٹرمپ خصوصی طیارے ایئر فورس ون کے زریعے الاسکا پہنچے، جہاں وہ روسی صدر ولادیمیر پیوٹن سے ملاقات کریں گے۔
امریکی صدر کے قریبی ساتھیوں میں وزیر خارجہ مارکو روبیو، وائٹ ہاؤس کے خصوصی ایلچی اسٹیو وٹکوف اور سی آئی اے کے ڈائریکٹر جان ریٹکلف بھی شامل ہیں، جو روس، یوکرین جنگ میں امن قائم کرنے کی کوشش میں ان کے ساتھ ہیں۔
ڈونلڈ ٹرمپ مقامی وقت کے مطابق صبح 11:30 بجے (پاکستانی وقت کے مطابق رات 12:20 بجے) ایلمینڈورف رچرڈسن بیس پر روسی صدر ولادیمیر پیوٹن سے ملاقات کریں گے۔
ایک امریکی عہدیدار نے نشریاتی ادارے سی این این کو بتایا کہ صدر ڈونلڈ ٹرمپ اور روسی صدر ولادیمیر پیوٹن کے درمیان سربراہی اجلاس میں تمام آپشنز میز پر موجود ہوں گے، جن میں یہ امکان بھی شامل ہے کہ اگر ٹرمپ کو محسوس ہوا کہ روسی صدر معاہدہ کرنے میں سنجیدہ نہیں تو وہ اجلاس سے واک آؤٹ کر دیں گے۔