کابل میں آج چین، پاکستان اور افغانستان کے درمیان اہم سہ فریقی اجلاس ہوگا، جس میں سیکیورٹی، معاشی تعاون اور دہشت گردی کے خاتمے پر مشاورت کی جائے گی۔
نائب وزیراعظم اسحاق ڈار وفد کے ہمراہ سہہ فریقی مذاکرات کے تیسرےدور کیلئے کابل پہنچ چکے ہیں، ان کے ساتھ نمائندہ خصوصی برائے افغانستان محمد صادق اور دیگر اعلیٰ حکام بھی موجود ہیں۔
کابل ائیرپورٹ پرافغانستان کے نائب وزیرخارجہ محمد نعیم نےاستقبال کیا۔ کابل ائیرپورٹ پر افغانستان میں پاکستان کے سفیر بھی موجود تھے۔
ذرائع کے مطابق چینی وزیر خارجہ بھارتی دورہ مکمل کرنے کے بعد اجلاس میں شرکت کے لیے کابل پہنچیں گے۔
سہ فریقی اجلاس کے موقع پر پاک افغان وزرائے خارجہ کے درمیان دوطرفہ ملاقات بھی متوقع ہے، جس میں سرحدی صورتحال، سیکیورٹی تعاون اور باہمی دلچسپی کے امور پر تبادلہ خیال کیا جائے گا۔
اجلاس کو خطے میں امن و استحکام کے لیے ایک اہم پیش رفت قرار دیا جا رہا ہے۔