پاکستان نے بھارت کے لیے اپنی فضائی حدود مزید ایک ماہ بند رکھنے کا فیصلہ کیا ہے، جس کا نوٹم جاری کردیا گیا ہے۔
پاکستان ایئرپورٹس اتھارٹی (پی اے اے) کی جانب سے بھارتی طیاروں کے لیے پاکستان کی فضائی حدود بندش میں 23 ستمبر تک توسیع کردی گئی ہے۔
اس حوالے سے پاکستان ایئرپورٹ اتھارٹی حکام کی جانب سے بھارتی طیاروں کی پاکستانی حدود کے استعمال میں پابندی میں ایک ماہ توسیع کا نیا نوٹم جاری کردیا گیا۔
یاد رہے کہ پاکستان نے 23 اپریل سے بھارتی طیاروں کے لیے فضائی حدود بند کر رکھی ہے جبکہ فضائی حدود کی بندش کے باعث بھارتی ایئرلائنز کو اربوں روپے کا نقصان ہوچکا ہے۔
خیال رہے کہ پاکستان مسلسل چوتھے ماہ بھارتی طیاروں پر اپنی فضائی حدود استعمال کرنے پر پابندی عائد کررہا ہے۔
اس سے قبل 23 اپریل کو بھارت نے مقبوضہ کشمیر کے مسلم اکثریتی علاقے پہلگام میں 26 سیاحوں کی مبینہ ہلاکت کے بعد سندھ طاس معاہدہ فوری طور پر معطل کرنے کا اعلان کیا تھا۔
24 اپریل کو پاکستان نے بھارت کے لیے فضائی حدود، سرحدی آمد و رفت اور ہر قسم کی تجارت بند کرنے کا اعلان کردیا تھا۔
پاکستان ایئرپورٹ اتھارٹی نے 23 مئی کو پہلہ مرتبہ بھارتی پروازوں کے لیے پاکستانی فضائی حدود کی بندش میں مزید توسیع کی تھی، جس کے بعد 23 جون کو اس میں مزید ایک ماہ کا اضافہ کیا گیا۔
پاکستان ایئرپورٹ اتھارٹی نے 19 جولائی کو ایک اور نوٹم جاری کیا تھا جس میں کہا گیا ہے کہ پابندی پاکستانی وقت کے مطابق 24 اگست صبح 4 بج کر 59 منٹ تک برقرار رہے گی۔