امریکا کے مشہور اور انسان دوست عدالتی فیصلوں کے باعث دنیا بھر میں مقبول ہونے والے جج فرینک کیپریو طویل عرصے تک لبلبے کے کینسر سے لڑنے کے بعد 88 برس کی عمر میں چل بسے۔ ان کے اہل خانہ کے مطابق وہ پُرامن طریقے سے اپنے پیاروں کے درمیان دنیا سے رخصت ہوئے۔
جج کیپریو اپنے نرم دلی، رحم اور انسانیت پر یقین رکھنے کی وجہ سے نہ صرف امریکا بلکہ دنیا بھر میں جانے جاتے تھے۔ ان کے عدالتی فیصلوں کی ویڈیوز لاکھوں بار سوشل میڈیا پر وائرل ہوئیں، جن میں وہ مجرموں کے حالات اور جذبات کو سمجھتے ہوئے ایسا انصاف کرتے تھے جو قانونی کے ساتھ ساتھ اخلاقی پہلو بھی اجاگر کرتا تھا۔ اسی رویے نے انہیں ’دنیا کے سب سے رحم دل جج‘ کے لقب سے مشہور کیا۔
فرینک کیپریو کو سب سے زیادہ شہرت ان کے ٹی وی شو ’Caught in Providence‘ سے ملی، جو 2000 میں شروع ہوا اور چار مرتبہ ڈے ٹائم ایمی ایوارڈز کے لیے نامزد ہوا۔ عدالت میں ان کا انداز ایسا تھا جس میں قانون کے ساتھ ساتھ ہمدردی، سمجھ بوجھ اور نرمی جھلکتی تھی۔ وہ اکثر کہا کرتے تھے کہ ’کبھی کبھی آپ کسی کی زندگی صرف اس کے کندھے پر ہاتھ رکھ کر یہ کہہ کر بدل سکتے ہیں کہ میں تم پر یقین رکھتا ہوں۔‘
معروف امریکی جج کینسر میں مبتلا، روحانی تسکین کیلیے تبلیغ پر روانہ
کیپریو نے تقریباً 50 سال قبل پروویڈنس، رہوڈ آئی لینڈ میں بطور جج خدمات سر انجام دینا شروع کیں۔ اس سے قبل وہ امریکن گورنمنٹ پڑھاتے رہے اور قانون کی تعلیم حاصل کرنے کے بعد 1985 میں پروویڈنس میونسپل کورٹ کے جج بنے، جہاں انہوں نے 2023 تک فرائض انجام دیے۔
دسمبر 2023 میں انہوں نے ایک ویڈیو پیغام کے ذریعے عوام کو بتایا تھا کہ انہیں لبلبے کے کینسر کی تشخیص ہوئی ہے۔ اس کے بعد انہوں نے علاج کے دوران مداحوں سے دعاؤں کی اپیل کی۔ مئی 2024 میں انہوں نے اپنی آخری ریڈی ایشن مکمل ہونے پر خوشی کا اظہار کیا تھا، مگر چند ماہ بعد دوبارہ طبی مسائل کے باعث اسپتال میں داخل ہونا پڑا۔
جج کیپریو کو نہ صرف ایک قابل جج بلکہ ایک شفیق شوہر، محبت کرنے والے والد، دادا، پردادا اور بہترین دوست کے طور پر یاد کیا جا رہا ہے۔ وہ اپنی زندگی اور فیصلوں کے ذریعے دنیا بھر کے لوگوں کو ہمدردی، درگزر اور نرمی اختیار کرنے کی ترغیب دیتے رہے۔
’تو باہر مل۔۔۔!‘: فیصلے سے غصہ ملزم کی خاتون جج کو دھمکی، کورٹ میں ہنگامہ
ان کے انتقال پر دنیا بھر سے مداح اور پیروکار انہیں خراجِ عقیدت پیش کر رہے ہیں اور اپیل کی جا رہی ہے کہ ان کے نقشِ قدم پر چلتے ہوئے معاشرے میں زیادہ محبت، نرمی اور انسانیت کو فروغ دیا جائے۔