کراچی میں کاؤنٹر ٹیررازم ڈیپارٹمنٹ (سی ٹی ڈی) سندھ اور وفاقی حساس اداروں نے مشترکہ کارروائی کرتے ہوئے بھارتی خفیہ ایجنسی ”را“ (RAW) کا ایک بڑا نیٹ ورک پکڑ لیا۔
کراچی میں ایڈیشنل آئی جی سی ٹی ڈی سندھ آزاد خان اور ڈی آئی جی نے پریس کانفرنس کرتے ہوئے بتایا کہ 18 مئی 2025 کو بدین کے علاقے ماتلی میں ایک فلاحی کاموں سے وابستہ 45 سالہ شہری کو ٹارگٹ کلنگ کا نشانہ بنایا گیا۔
اس کیس کی تفتیش کے دوران 8 جولائی کو 4 ملزمان کو گرفتار کیا گیا جن سے تفتیش کے دوران بھارتی خفیہ ایجنسی ”را“ کے نیٹ ورک کا انکشاف ہوا۔
ایڈیشنل آئی جی آزاد خان نے بتایا کہ واردات کی سی سی ٹی وی فوٹیج میں 3 ملزمان کو واضح طور پر دیکھا گیا جبکہ عینی شاہدین نے بھی ان کی شناخت کی۔ قتل کے الزام میں دو ملزمان کو گرفتار کر کے ان کے قبضے سے واردات میں استعمال ہونے والا پستول اور موٹر سائیکل بھی برآمد کی گئی۔
پریس کانفرنس میں انھوں نے بتایا کہ تفتیش کے دوران یہ بات سامنے آئی کہ قتل کی منصوبہ بندی بھارتی ایجنٹ سنجے سنجیو کمار عرف ”فوجی“ نے کی، جو ایک خلیجی ریاست میں مقیم ہے۔
انہوں نے بتایا کہ سنجے کمار نے پاکستان کے ضلع شیخوپورہ سے تعلق رکھنے والے سلمان ورک کو ہائر کیا، جس نے محمد عمیر ورک نامی شہری سے رابطہ کیا۔ عمیر اس پوری کارروائی کا کمانڈر تھا، جس نے شکیل احمد، محمد سجاد اور محمد عبید کے ذریعے رقم تقسیم کی۔
آزاد خان کے مطابق، تمام گرفتار ملزمان سنجے کمار سے براہ راست رابطے میں تھے اور را نے اس کارروائی کے لیے علیحدگی پسند تنظیم کو بھی بطور ہتھیار استعمال کیا۔
حکام نے مزید بتایا کہ پاکستانی شہری محمد ارسلان ولد حبیب احمد، جو ایک خلیجی ریاست میں مقیم ہے، سنجے کمار سے ملا اور اسی نے حملے کے لیے ہٹ ٹیم کو مالی و لاجسٹک سہولیات فراہم کیں۔
ایڈیشنل آئی جی آزاد خان کے مطابق را نے اس قتل کی منصوبہ بندی اور عمل درآمد کے لیے بھاری رقم خرچ کی، اور اس واقعے پر بھارتی میڈیا نے کھل کر خوشی کا اظہار کیا۔
حکام کا کہنا تھا کہ اس نوعیت کی دہشت گردی ”اسٹیٹ اسپانسرڈ ٹیررازم“ کے زمرے میں آتی ہے اور پاکستان اس معاملے کو ہر متعلقہ فورم پر اٹھائے گا۔ گرفتار ملزمان سے تفتیش جاری ہے جبکہ مزید گرفتاریاں بھی متوقع ہیں۔