پنجاب میں سرکاری دوروں کے دوران پھولوں کے بوکے اور تحائف پیش کرنے پر پابندی عائد کر دی گئی۔
ذرائع کے مطابق سیکرٹری ایجوکیشن نے تمام اضلاع کے سی سی اوز ایجوکیشن کو مراسلہ جاری کردیا۔
مراسلے میں کہا گیا ہے کہ سیکرٹری ایجوکیشن کے مختلف دوروں کے دوران اسکول انتظامیہ کی جانب سے پھولوں کے بوکے اور دیگر مہمان نوازی کے لیے اخراجات کا بےجا استعمال دیکھا گیا ہے۔
مراسلہ میں تحائف کے اخراجات اسکولوں اور طلباء کی فلاح و بہبود کے لیے وقف کرنے کی ہدایت دے دی گئی ہے۔
سیکرٹری ایجوکیشن نے اس حوالے سے کہا ہے کہ سادگی اپنائی جائے، سرکاری دوروں پر پھول، تحائف پیش نہ کئے جائیں۔
ان کا کہنا ہے کہ تمام ایجوکیشن افسران نمائشی کلچر کی حوصلہ شکنی کریں۔ سیکرٹری ایجوکیشن کی محکمہ کے تمام افسران کو مراسلے پر عملدرآمد فوری یقینی بنانے کی ہدایت کردی۔