ایشیا کپ 2025 کے فائنل سے قبل بھارتی ٹیم کو بڑا دھچکا پہنچنے کا امکان ہے کیونکہ انڈین ٹیم کے ایک میچ وننگ کھلاڑی کے آخری میچ سے باہر ہونے کا خدشہ ظاہر کیا جا رہا ہے۔
بھارتی میڈیا کی رپورٹ کے مطابق آل راؤنڈر ہاردک پانڈیا کی فائنل میں شرکت مشکوک قرار دی گئی ہے۔ وہ گزشتہ روز کھیلے گئے سری لنکا کے خلاف سپر فور کے آخری میچ میں انجری کا شکار ہوکر میدان سے باہر چلے گئے تھے۔ یہ میچ جمعہ 26 ستمبر کو دبئی انٹرنیشنل کرکٹ اسٹیڈیم میں کھیلا گیا تھا۔
بھارت نے پہلے بیٹنگ کرتے ہوئے 202 رنز کا ہدف دیا تھا۔ سری لنکن اوپنر کوسل مینڈس کو پانڈیا نے اپنے پہلی ہی اوور میں آؤٹ کردیا تھا، تاہم اوور کے اختتام پر وہ ران پر ہاتھ رکھے ہوئے دکھائی دیے جس کے بعد وہ فوراً میدان سے باہر چلے گئے تھے۔ تاہم وہ کھیل میں واپس نہیں آئے جس پر فائنل سے قبل بھارتی ٹیم کو سخت تشویش لاحق ہوگئی۔
بعدازاں بھارتی ٹیم کے بولنگ کوچ مورنے مورکل نے وضاحت دیتے ہوئے کہا ہے کہ ہاردک پانڈیا کو دبئی کی نمی بھری فضا میں شدید کرمپ کا سامنا ہوا ہے تاہم یہ کوئی بڑی انجری نہیں ہے۔ “ہم ان کی فٹنس کا جائزہ ہفتے کو لیں گے اور اسی بنیاد پر فائنل کے لیے ان کی دستیابی کا فیصلہ ہوگا۔
بھارت کے نوجوان بلے باز ابھیشیک شرما، جنہوں نے ٹورنامنٹ میں مسلسل تیسری نصف سنچری مکمل کی، دورانِ فیلڈنگ کریمپس کا شکار ہوکر عارضی طور پر میدان سے باہر چلے گئے تھے، تاہم بعد میں واپس آ گئے تھے۔ مورنے مورکل کے مطابق ”دونوں کھلاڑیوں کو صرف کریمپس کا مسئلہ تھا۔ ابھیشیک میچ کے اختتام تک بالکل ٹھیک تھے۔“
بھارتی میڈیا کے مطابق اگر پانڈیا فائنل کے لیے دستیاب نہ ہوئے تو بھارت کی ٹیم میں ان کی جگہ ارشدیپ سنگھ کو شامل کیے جانے کا امکان ہے۔
سری لنکا کی جانب سے پتھم نسانکا نے شاندار 107 رنز اسکور کیے تھے اور اپنی ٹیم کو 20 اوورز میں 202 رنز تک پہنچا کر میچ برابر کر دیا تھا۔ تاہم سری لنکا نے سپر اوور میں بھارت کو 3 رنز کا ہدف دیا، جو اُس نے ایک ہی گیند پر حاصل کرلیا تھا۔
واضح رہے کہ بھارت اور پاکستان پہلی بار ایشیا کپ کے فائنل میں آمنے سامنے ہوں گے۔ بھارت 2022 کے ایشیا کپ سپر فور میچ کے بعد سے ٹی ٹوئنٹی فارمیٹ میں پاکستان کے خلاف ناقابلِ شکست رہا ہے۔